jk katika upatanishi

Mwenyekiti wa Umoja wa Afrika AU, Rais Jakaya Mrisho Kikwete amemaliza mkutano wake na Kiongozi wa Chama cha ODM, Bw. Raila Odinga. Mkutano huo umefanyika katika Hoteli ya Grand Regency Mjini Nairobi.

Mkutano huo ulikuwa mzuri na wenye manufaa, na Rais Kikwete anaendelea na majadiliano na pande zote zinazohusika katika mgogoro wa kisiasa nchini Kenya. Baada ya kuwa amemaliza kukutana na Bw. Raila Odinga, Rais Kikwete aliondoka kwenda kukutana na Rais Mwai Kibaki ofisini kwake katika jengo la Harambee.

Rais Kikwete ameridhishwa na kazi ya upatanishi iliyofanyika mpaka sasa, hata hivyo Rais Kikwete anaamini kwamba bado kuna kazi zaidi ya kufanywa. Rais Kikwete vilevile ana imani kwamba hakuna jambo lisilowezekana, na kuwa matatizo ya sasa ya kisiasa ya Kenya yatapatiwa ufumbuzi..

Upatanishi katika mgogoro wa kisiasa wa Kenya unaongozwa na Katibu Mkuu wa zamani wa Umoja wa Mataifa, Dr. Kofi Annan. Pamoja na Dr. Annan, katika kundi hilo la upatanishi la AU, ni Rais mstaafu Benjamin Mkapa na mke wa Rais wa zamani wa Afrika ya Kusini, Mama Graca Machel.

Rais Kikwete aliwasili mjini Nairobi jana jioni ili kuongeza nguvu katika upatanishi wa mgogoro wa Kenya unaoendeshwa chini ya usimamizi wa AU. Jana hiyo hiyo Rais Kikwete alikutana na Dr. Annan pamoja na Mzee Mkapa katika mkutano wake wa kwanza. Mashauriano yanaendelea.

Na
Salvator Rweyemamu
Mkurugenzi wa Mawasiliano ya Rais na Habari,
NAIROBI,

Kenya.

27 Februari, 2008