tabata tampo wapigwa tafu na easy finance

Shirika linalojishughulisha na utoaji wa mikopo ya biashara nchini la Easy Finance limetoa msaada wa vyandarua na dawa za kutibu maji kwa waathirika wa bomoa bomoa ya Tabata Dampo jijini Dar es Salaam.

Msaada uliotolewa ni wa vyandarua vyenye viuatilifu 400 na vidonge vya dawa ya kutibu maji vya WaterGuard catoni 16 vyote vikiwa na thamani ya karibu shilingi millioni tatu.

Msaada huo umetolewa ili kusaidia kuwalinda waathirika hao wapatao 400, ambao kwa sasa hawana makazi, dhidi ya magonjwa ya matumbo kama vile kipindupindu na ugonjwa hatari wa malaria.

Wananchi hao wa Tabata Dampo kwa sasa hawana makazi ya kudumu baada ya Manispaa ya Ilala kubomoa nyumba zao kwa madai kuwa zilijengwa katika eneo hilo kimakosa.

Akizungumza mara baada ya kukabidhi msaada huo, Mwenyekiti na Mkurugenzi Mtendaji wa Easy Finance, Isaack Kasanga alisema kuwa shirika lake limeguswa na matatizo yaliyowakuta wakazi hao ndiyo maana limeamua kutoa msaada huo ili kulinda afya zao.

“Matatizo mliyoyapata ndugu zetu yametugusa sana, ndiyo maana shirika letu kwa kushirikiana na PSI-Tanzania tukaona tukae pamoja na kujadiliana jinsi ya kuweza kusaidia walau katika kuwakinga dhidi ya magonjwa ya mlipuko kama vile kipindupindu na hata ugonjwa hatari wa malaria,” alisema.

Aliwaeleza waathirika hao kuwa vyandarua vilivyotolewa vitatosha kumpatia kila mmoja kimoja na kuwa kama vitatumika vizuri basi vitaweza kuwakinga dhidi ya kuumwa na mbu waambukizao ugonjwa wa malaria.

“Ni imani yetu pia kuwa sasa mtaweza kutibu maji kabla ya kuyatumia kwa dawa hii ya WaterGuard na jambo hilo litaweza kuwalinda na magonjwa ya milipoko ya matumbo ambayo mara nyingi hutokea katika mazingira kama haya ya watu kutokuwa na sehemu maalumu na za uhakika wa vyanzo vya maji na maeneo ya kujisaidia.”