benki ingine mpya yanukia bongo

JK akisalimiana na Bibi Rahma Chahbal, mmoja wa wajumbe kutoka Gulf African Bank, uliofika Ikulu kwa mazungumzo, katikati ni mwenyekiti wa benki hiyo bwana Suleiman Chahbal.

Kampuni ya Gulf-Africa Group yenye makao yake makuu katika Falme za Nchi za Kiarabu (UAE) itaanzisha benki nchini itakayojulikana kama Gulf-Africa Bank (Tanzania) Limited.

Kampuni hiyo ya Gulf-Africa Group inaundwa kwa pamoja na kampuni mbili ambazo ni Gulf Capital yenye makao yake Dubai, na Noor Capital yenye makao yake Abu Dhabi.

Mtendaji Mkuu wa Noor Capital, Suleiman Bin Shahbal amemwambia JK siku ya Jumatano, Januari 14, 2009, kuwa tayari kampuni yake imewasilisha Benki Kuu ya Tanzania (BOT) maombi yake ya kufungua benki hiyo katika Tanzania.

Katika mkutano huo uliofanyika Ikulu, Dar es Salaam, mtendaji huyo mkuu amemwambia JK kuwa kuanzishwa kwa benki hiyo katika Tanzania ni kupanua shughuli za kampuni ya Gulf-Africa Group katika Afrika Mashariki.

Amesema kuwa tayari kampuni hiyo inayo benki kama hiyo yenye matawi tisa katika Kenya. Amesema kuwa kampuni hiyo pia inajishughulisha na uwekezaji katika maeneo ya mafuta na gesi, mawasiliano ya simu, elimu na ujenzi wa nyumba za biashara.

JK ameikaribisha kampuni hiyo kuwekeza katika Tanzania, akisisitiza kuwa sera ya Serikali yake ni kukaribisha wawekezaji wote kutoka ndani na nje ya nchi