chadema yatema wanachama 15

Katibu Mkuu wa Chadema Dk. Wilbroad Slaa aikongea na waandishi. Shoto ni Mzee Edwin Mtei

CHAMA cha Demokrasia na Maendeleo (CHADEMA), kimewafukuza wanachama wake 15 na kutengua nafasi ya mjumbe wa Kamati Kuu kwa madai kuwa ni mamluki wanaoleta vurugu ndani ya chama hicho.

Uamuzi wa kuwafukuza wanachama hao ulifikiwa jana katika kikao cha Kamati Kuu kilichokaa kuanzia asubuhi hadi saa 6 usiku Dar es Salaam na ilifikia uamuzi huo, baada ya kuridhika na ripoti ya Kamati ya Bob Makani, iliyoundwa kuchunguza tuhuma zilizotolewa na wanachama hao dhidi ya Mwenyekiti wao, Freeman Mbowe.

Wanachama hao ni Abdul Mateleta, Nasir Chimko, Hamisi Msasa, Abdallah Kaoneka, Mkwanji Maulid, Bimkubwa Uwesu na Peter Katunka (huyu anadaiwa ni mtumishi wa Mbunge wa Ubungo, Charles Keenja). 

Wanachama wengine waliotimuliwa ni Zuberi Haji, Kimaro T, Bakari Shingo, Shaaban Salum, Adam Yasin, Said Mareja, Mwanahamisi Sadiki na Martin Mng’ongo, aliyekuwa Kaimu Mwenyekiti wa Wilaya ya Kinondoni, ambaye inadaiwa alikuwa mpangaji na mshauri mkuu wa mpango wa uasi ndani ya chama na anavujisha  nyaraka zote.

Kamati Kuu ya Chadema pia ilitengua nafasi ya mjumbe wa Kamati Kuu ya Mecky Mzirai na kumpa onyo kutokana na kudaiwa kuvujisha siri za chama na kupanga mikakati ya kuleta vurugu ndani ya chama hicho. Hata hivyo rufaa yake ipo wazi kwa kusikilizwa endapo ataikata.