maximo awashushua makocha wanaompiga vita

Marcia Maximo

Siku moja baada ya serikali kumwongezea mkataba wa kukinoa kikosi cha timu ya taifa kwa mwaka mmoja zaidi , kocha Marcio Maximo amejibu vikali tuhuma zinazoelekezwa kwake na makocha wazawa ikiwa ni pamoja na kumtuhumu kutotoa ushirikiano kwao.

Pamoja na kukanusha madai mbalimbali ya makocha hao , Kocha huyo Mbrazil alisema ameshangazwa na baadhi ya makocha kumrushia tuhuma na kudai pengine wanatafuta kuandikwa na vyombo vya habari.

Maximo alisema hayo jana jijini Dar es Salaam katika mahojiano maalumu na mtandao wa www.dailynews.co.tz na kuongeza kuwa hata kama hakuja nchini kutoa mafunzo kwa makocha wazawa amekuwa na ushirikiano mzuri na wenyeji wake na kusikiliza maoni yao ndani na nje ya uwanja wa soka.

“Katika mkutano wa mwisho wa makocha uliofanyika hapa nchini niliwaeleza wazi makocha kwamba ofisi yangu iko wazi na wao wako huru kuja kwa ajili ya kubadilishana mawazo ya utaalamu wa soka pamoja na uzoefu”.

Alisema lakini kwa mshangao mwitikio wao umekuwa mdogo kwani ni wachache ndiyo wameweza kufika jambo ambalo alilitafsiri kuwa linawezekana kuwa ni makocha hao wanaona aibu kuzungumza naye na hajui sababu yake ni nini.

Hata hivyo kocha huyo aliongeza anaamini kila kocha ana uzoefu wa aina yake katika kufundisha soka na kama kocha mtaalamu hakuja nchini kufundisha pekee bali kujifunza ujuzi mpya pia.

“Nimekuwa nikimsisitizia Mkurugenzi wa Ufundi wa Shirikisho la Soka Tanzania (TFF), Sunday Kayuni kuandaa mjadala maalumu wa pamoja na makocha wazawa kwa ajili ya kubadilishana ujuzi na mbinu za ufundishaji soka,”alisema.

Maximo ambaye anatarajiwa kuondoka nchini leo mchana kwenda kwao Brazil kwa ajili ya mapumziko ya wiki mbili, alisema hakuongeza mkataba wake kwa ajili ya kitita cha fedha anachopewa bali kwa sababu amejikita kuhakikisha soka la Tanzania linainuka kufikia ngazi ya kimataifa.

“Hivi karibuni tulipokuwa Ivory Coast wakati wa michuano ya Mataifa ya Afrika kwa Wachezaji wanaocheza Ligi za Ndani (CHAN), nilipata ofa za kufundisha timu za mataifa mawili yanayoheshimika kwenye soka, awali Afrika Kusini walinifuata ili nijiunge nao lakini niliwaeleza fedha kwangu si lolote,” alifafanua Maximo.

Waziri wa Habari, Utamaduni na Michezo Mh. George Mkuchika akipiga stori na Maximo huku Rais wa TFF Sir Leodegar Chilla Tenga (kulia) na mwandishi wa Michezo wa Star TV wakisikiliza

Maximo anatarajiwa kurejea nchini katikati ya mwezi ujao wakati kikosi cha Taifa Stars kitakapoingia kambini kwa ajili ya kujiandaa na michuano mingine ya kimataifa.

Wakati huohuo wadau kadhaa wametoa maoni yao kuhusiana na kuongezwa kwa mkataba wa kocha Maximo na kupongeza uamuzi huo uliofanywa na serikali na TFF.

Mmoja wa wadau hao kocha maarufu nchini ambaye pia ni kocha wa kikosi cha taifa cha wanawake ‘Twiga Stars’ , Charles Boniface Mkwasa , alipongeza uamuzi huo na kusema muda alioongezwa utampa nafasi ya kukamilisha programu zake alizoanzisha kwenye timu ya taifa.

Hata hivyo Mkwasa ameitaka TFF kusaka kocha mzawa kwa ajili ya kumsaidia majukumu Maximo ambaye kwa maoni yake atajifunza masuala kadhaa kutoka kwa mtaalamu huyo na kuisaidia nchi pale mkataba wa Maximo utakapokwisha.

“Maximo ni kocha ambaye anatoa ushirikiano mkubwa kwetu na amekuwa akikubali ushauri na mawazo yetu lakini amekuwa na nafasi ndogo ya kuyaongeza kwenye mafundisho yake lakini sasa tuna matumaini atayafanyia kazi baada ya kuongezewa muda huo wa mwaka mmoja,” alisema Mkwasa.

Katika hatua nyingine Maximo amewaomba wadau wa soka nchini na umma wa Watanzania kuwasaidia wachezaji kudumisha nidhamu katika harakati za kufanya waweze kuishi kama wachezaji wa kulipwa.

Akizungumza na waandishi wa habari jana kwenye ofisi za TFF Karume Ilala Maximo alisema: “Kuna haja ya jamii yote kusaidia kuwaeleza wachezaji kucheza soka ya kitaaluma, si ile ya wachezaji kutokuwa na nidhamu au mchezaji anafikia kujisingizia kuwa ni majeruhi.

Hili kocha peke yake hataweza”. Alisema kuwa wanachotakiwa wachezaji ni kuhakikisha wanajitunza na hata pale watakaporudi kwenye klabu zao kwa kufuatilia kula mlo kamili na hata kwenda gym mara mbili kwa wiki.

“Kikosi changu kinaonekana sasa kimebadilika, tulipowafunga Ivory Coast, nilitegemea ningekuta wachezaji labda wanashangilia, lakini ilikuwa ni tofauti, pamoja na kuwa na furaha ya ushindi lakini walikuwa wametulia.

Maana suala la ushindi halikuwa geni kwao, labda hali kama hiyo ingetokea miaka ya nyuma.”

Akizungumzia hatua yake ya kusaini mkataba mpya, Maximo alisema kuwa pamoja na kuwa alikuwa akihitajika na timu mbili, lakini alijiona anaguswa na ombi la Tanzania la kutaka kuendelea kuifundisha.

Aidha, Maximo aliwashukuru viongozi wa TFF, serikali kwa ujumla akiwamo Rais Jakaya Kikwete, Waziri wa Habari, Utamaduni na Michezo George Mkuchika na Naibu wake Joel Bendera kwa kushirikiana naye.

SOURCE: