Waliokufa katika ajali ya meli zenji watambuliwa

WAZIRI WA NCHIAFISI YA WAZIRI KIONGOZI MH. A HASSAN JUMA AKIZUNGUMZA NA WAANDISHI WA HABARI WA VYOMBO MBALIMBALI KATIKA ENEO LA TUKIO BANDARINI LEO.

HABARI KAMILIFU

Na Mwajuma Juma, Zanzibar

MAJINA ya watu sita waliokufa maji katika ajali ya meli ya mizigo ya mv Fatih yametambuliwa.
Meli hiyo ilipinduka na kuzama usiku wa kuamkia juzi katika Bandari ya Malindi muda mfupi baada ya kuwasili ikitokea Dar es Salaam. Watu wengine 27 waliokolewa.

Kwa mujibu wa Dkt.Mariamu Ahmed wa Hospitali ya Mnazi mmoja ya mjini hapa, waliokufa ni Yusuf Ali Omari(10)na Awena Nassoro Ali (40), wote wa familia moja, wakazi wa
Mwanakwerekwe maili nne, Zanzibar.

Wengine ni Bi. Ashura Suleiman Mtega(40),Ali Haroub Mohamed (3) na Mukrim Mohamed(6) ambao ni ndugu, wakazi wa Mtopepo, Zanzibar . Mwingine ni Bi.Neema Meshack(19) mkazi wa Dodoma ambaye alisafirishwa jana kwenda kwao.

Wakati huo huo Serikali ya Mapinduzi ya Zanzibar imeamua kuagiza chombo cha kusaidia kuopoa meli hiyo ambayo bado imezama bandarini hapo baada ya juhudi za kuitoa kwa kutumia
upepo, kukwama.

Hayo yalielezwa na Waziri wa Nchi Ofisi ya Waziri Kiongozi, Bw. Hamza Hassan Juma, alipokuwa akizungumza na waandishi wahabari katika eneo la tukio muda mfupi baada yakikao cha
Kamati ya Maafa kumalizika kujadili suala hilo.

Waziri Hamza, alisema kwamba Serikali imeamua kuagiza kifaa cha kuongozea meli (tagi) ili kusaidia kuopoa meli hiyo ambayo imezama ikiwa na shehena ya mizigo na abiria.

Alifafanua kuwa awali meli hiyo ilikuwa itolewe kwa kujazwa upepo kwa kutumia mashine maalumu, lakini ilishindikana baada ya upepo kutoka kila wataalamu walipokuwa wakiujaza.

"Tatizo hilo lilisababishwa na matobo matatu yaliyogundulikakatika meli hiyo na kulazimika kuzibwa kwa kutumia 'welding'(mashine ya kuchomelea vyuma) lakini bado imeshindwa kuja juu,"alisema Bw.Hamza.

Akizunumgumzia mkasa huo, alisema ripoti inaeleza kwamba meli hiyo baada ya kufikia eneo la Chumbe ikiwa umbali mfupi kutoka Bandari ya Zanzibar, ilianza kuingiza maji na mabahari walichukua hatua ya kumwaga maji hayo kwa kutumia pampu huku wakiendelea na safari .

"Nahodha aliwasiliana na watu wa bandari na wao wakamshauri afunge gati katika Bandari ya Malindi lakini chanzo cha kupinduka meli bado hatujakipata na tunaendelea na uchunguzi zaidi", alisema.

Hata hivyo alisema kwamba kumbukumbu zinaonesha chombo hicho kilikaguliwa hivi karibuni na kupasishwa ingawa kinaoneka kina matobo chini lakini hilo litategemea ripoti za wataalamu wanaochunguza ajali hiyo.

Aidha alisema idadi ya abiria waliokuwemo katika chombo hicho imeelezwa walikuwa 35 na
mabaharia 13, lakini waliookolewa ni 27 jambo ambalo linaonesha meli hiyo ilikuwa na watu wengi zaidi ya waliotajwa.

"Ukweli utapatikana baada ya chombo kuopolewa na kama kuna vitendo vya ukiukwaji wa sheria hatua zitachukuliwa kulingana na uzito wa kosa lenyewe", alieleza.

Bw. Hamza alisema Kamati imetenga sh.milioni 20, kushughulikia tatizo hilo na kuwataka wananchi ambao hawajawaona ndugu zao, watoe ripoti kwa kamati hiyo ambayo imeanza kupokea matatizo hayo kupitia ofisi yake ya muda iliyofunguliwa bandarini hapo.

Kamanda wa Polisi Mkoa wa Mjini Magharibi Unguja, Bw. Bakari Khatib Shaaban, amesema juhudi zinaendelea za vikosi vya uokoaji lakini hakuna maiti zilizopatikana zaidi ya tano.

"Juhudi za kuopoa chombo zinaendelea lakini mpaka sasa sina jipya zaidi ya watu watano waliopatikana na wale 27 waliokolewa awali," alieleza Kamanda huyo.

Meli hiyo ilizama katika Bandari ya Malindi ikiwa na shehena ya mbao, mchele, unga wa ngano na soda, ambapo hadi jana baadhi ya vitu vilikuwa vikiokolewa huku ulinzi ukiimarishwa bandarini hapo baada ya vibaka kuanza kuzamia baharini na kubeba vitu hivyo eneo la Forodhani.

Kutokana na hali hiyo, Jeshi la Ulinzi la Wananchi wa Tanzania (JWTZ) limeimarisha ulinzi katika maeneo ya kuingia na kutoka bandarini hapo lakini kumekuwepo huku likizuia mtu
yeyote kuingia zaidi ya wafanyakazi wa bandari na abiria.