membe kumwakilisha JK mkutanoni misri

Mkutano wa Wakuu wa Nchi na Serikali wa Nchi Zisizofungamana na Upande Wowote (NAM) unatarajiwa kufanyika Sharm El Sheikh, Misri tarehe 15 hadi 16 Julai, 2009. Huu ni mkutano wa kawaida wa NAM ambao hufayika kila baada ya miaka mitatu.

Waziri wa Mambo ya Nje na Ushirikiano wa Kimataifa, Mhe. Bernard K. Membe (Mb) atamwakilisha Rais wa Jamhuri ya Muungano wa Tanzania, Mhe. Jakaya Mrisho Kikwete katika mkutano huo.

Mkutano huo utatanguliwa na mkutano wa Mawaziri wa Mambo ya Nje wa nchi za NAM unaofanyika tarehe 13 na 14 Julai, 2009.

Maudhui ya mkutano huo ni pamoja na Mtikisiko wa Kiuchumi Duniani; Mageuzi katika Vyombo vya Fedha Duniani; Mageuzi katika Umoja wa Mataifa na Migogoro ya Kisiasa Duniani.

Aidha, mkutano huo unategemewa kupitisha maazimio mbalimbali yaliyopendekezwa na mkutano wa Mawaziri huko Tehran, Iran mwaka 2008 na ule wa Havana, Cuba mwezi Mei, 2009.

Mhe. Waziri Membe ataambatana na Balozi wa Tanzania kwenye Umoja wa Mataifa, Mhe. Dkt. Augustine Mahiga Na Balozi wa Tanzania nchini Misri, Mhe. Ali Shauri Haji.

IMETOLEWA NA: WIZARA YA MAMBO YANJE NAUSHIRIKIANO WA KIMATAIFA, DAR ES SALAAM
13 JULAI, 2009