Ndege ya Ethiopian Airlines yakwama zenji usiku huu

Ndege ya Shirika la Ndege la Ethiopia Airlines imekwama uwanja wa ndege wa kimataifa wa Zanzibar ilikotua jioni ya leo milango ya saa kumi hivi ikitokea Addis Ababa na abiria kibao wa Dar.

Habari za uhakika kutoka visiwani humo zinasema ndege hiyo yenye namba ya mruko ET 805 ilikuwa imechelewa kiasi cha masaa manne kutua Dar na kwa vile ina kawaida ya kupitia Zenji kutoka Dar kubeba abiria, ikaonelewa kwamba heri ipite kwanza Zanzibar na kubeba abiria ili isisumbuke tena kwenda visiwani wakati wa kuondoka.

Ilipotua Zenji ndege hiyo ilipata matatizo ya kiufundi na kulazimika kutafuta ufumbuzi kwa masaa kadhaa na kushindikana, ikiwa ni kutoka saa kumi jioni hadi saa nne usiku. Hivyo abiria zaidi ya 45 waliotakiwa kushuka Dar leo wamejikuta wakipelekwa mahotelini ili kusubiri safari kesho asubuhi ambapo inasemekana zimekodishwa ndege za Precision Air kuwavusha bahari.

Wenye mizigo mingi wameahidiwa kuletewa mizigo yao kesho na ndege kubwa itayofika mchana.

Zogo kubwa liliumuka uwanjani hapo, hasa toka kwa abiria wanaounganisha ndege kuelekea kwingineko, na pia wafanyabishara ambao walikuwa wametoka mashariki ya mbali wakiwa na bidhaa kadhaa mahususi kwa Idd el Fitr inayotarajiwa wikiendi hii ama Jumatatu kutegemea na kuandama kwa mwezi.

Globu ya Jamii inafuatilia sakata hili

na itatoa taarifa za hatma ya safari hiyo.