kilele cha shughuli ya butiama leo

JK akiwa na Mama Maria Nyerere muda mfupi baada ya kuweka shada la maua katika kaburi la Baba wa Taifa Marehemu Julius Nyerere huko Butiama kijijini leo mchana.
JK akiwa na mwenge wa uhuru muda mfupi baada ya kuupokea katika viwanja vya Butiama leo wakati wa kilele cha mbio hizo.Kulia ni waziri wa Kazi na ajira Zanzibar Asha omar Abdallah na kushoto ni Waziri wa Kazi ajira na Maendeleo ya vijana Profesa Juma Kapuya.

JK akimkabidhi mkuu wa wilaya ya Mvomero Fatma Mwassa hundi ya mfano ya shilingi milioni moja baada ya kuibuka mshindi kwa wilaya ilioongoza kwa maandalizi ya mbio za Mwenge mwaka huu

JK na Mama Salma Kikwete wakiwa katika mazungumzo na Mama Maria Nyerere Nyumbani kwake Butiama jana wakati wa kilele cha kumbukumbu ya miaka kumi tangu kufariki Baba wa Taifa Mwalimu Julius Nyerere. Picha na Mdau Freddy Maro wa Ikulu.

JK ATEMA CHECHE BUTIAMA
Rais Jakaya Mrisho Kikwete ameonya vikali kuwa taifa la Tanzania linaweza kuingia katika mgawanyiko mkubwa endapo Watanzania wataendelea kupuuza urithi wa Baba wa Taifa, Mwalimu JK Nyerere wa kupinga ubaguzi kwa misingi yoyote ile.

Rais Kikwete ameonya kuwa kuchezea umoja wa kitaifa ni sawa na kumwaga na kucheza na petrol kwenye moto.

Aidha, Rais Kikwete amesema kuwa njia isapayo zaidi ya kumuezi Mwalimu Nyerere ni kutekeleza kwa vitendo yote aliyosimamia Mwalimu katika uhai wake ambayo ni pamoja na kudumisha uhuru wa Tanzania, kulinda umoja wa Watanzania, kudumisha maadili mema na kupambana na maadui wakuu wa maendeleo.

Rais Kikwete alikuwa akizungumza kwenye Sherehe za Kuzima Mwenge wa Uhuru mwaka huu zilizofanyika leo, Jumatano, Oktoba 14, 2009, kijijini Butiama, Mkoani Mara sherehe iliyokwenda sambamba na Kumbukumbu za Miaka 10 tokea kifo cha Mwalimu Nyerere.

Sherehe hizo kwenye kijiji cha Butiama ambako alizaliwa na kuzikwa Mwalimu, pia zilikuwa zinahitimisha Wiki ya Taifa ya Vijana, na zilihudhuriwa na wageni kutoka Angola, Mozambique, Namibia na Zimbabwe.

Akizungumza kwenye sherehe hizo, Rais Kikwete ametaja mambo ambayo Watanzania wanastahili kuyafanya ili kuthibitisha kweli kuwa wanamuezi Mwalimu, akisisitiza umuhimu usiokuwa na kifani wa kulinda na kudumisha umoja wa taifa, bila kulimegamenga kwa misingi ya udini, ukabila ama rangi.
“Wapo watu wanafanya mchezo na umuhimu wa kulinda na kudumisha uhuru na umoja wa taifa letu.

Tukifanya mchezo na suala la umoja, tutajuta. Tusidanyike ama tusidanganywe na viongozi wetu wa siasa ama dini kutuingiza katika vitendo vinavyoweza kuvuruga umoja wetu kwa misingi ya dini, ukabila ama rangi,” amesema Rais Kikwete na kuongeza:

“Uhuru na Umoja ndizo zilikuwa kaulimbiu kubwa na muhimu zaidi za Mwalimu Nyerere na hivyo kama kweli tunataka kumuezi ni lazima tudumishe mambo hayo,” amesema Mwalimu Nyerere na kutoa mwito maalum kwa vyombo vya habari:

“Tusaidieni. Mkiendelea kuwa vipaza sauti vya ujumbe huu wa kuvunja umoja wa kitaifa kwa misingi ya dini, siasa ama ukabila tutaingia katika matatizo makubwa,” amesema Rais Kikwete na kuongeza:

“Pale Rwanda, mauaji yote yale makubwa yalichochewa na kuongozwa na redio moja tu, Millie Collines (RTLM). Nawaombeni, tusichezee na kumwaga moto kwenye petrol.”

Amesisitiza Rais Kikwete: “Tukigawanyika kwa misingi ya kidini, kikabila ama kwa rangi, hakuna mshindi. Mnajua yaliyowapata majirani zetu. Naviomba vyombo vya habari vipuuzed sauti hizi zinazotaka kuigawa nchi yetu kwa misingi hiyo.

Msipowapa nafasi kwenye televisheni zenu, kwenye magazeti yenu, watanyamaza. Tukiwapuuza, wataacha kutugawa kwa sababu hawa wengine wanalipwa, ili washiriki katika kuvuruga umoja wetu.”

Akizungumzia namna ya kumuezi Mwalimu Nyerere, Rais Kikwete amesema kuwa urithi wa Mwalimu Nyerere ni kudumisha yale yote aliyojenga na kuyasimamia Mwalimu Nyerere kwa kuanzia na uhuru.

“Mwalimu alipigania, alitetea na aliulinda uhuru wetu. Ni wajibu wetu na sisi kufanya hivyo. Kama ni lazima tutaupigania na kujitolea mhanga, kama tulivyofanya mwaka 1978.”

Rais Kikwete amesema jambo jingine ambalo Watanzania wana wajibu wa kumuenzi Mwalimu ni katika moyo wa kujitolewa na kujenga na kudumisha umoja wa taifa la Tanzania.

“Kujenga na kudumisha umoja katika nchi hii ni kazi kubwa sana, Nchi yenye makabila mengi namna hii, yenye makabila mengi kiasi hiki. Lakini Mwalimu alijenga, akadumisha na kutetea umoja wa nchi yetu wakati na baada ya kutoka madarakani,” amesema Rais Kikwete na kuongeza:

“Mafanikio yake yalitokana na msimamo wake wa kuondoa ubaguzi wa aina zote, wa dini, wa kabila na wa rangi. Tukiipuuza misingi hii, tutabakia na nchi yenye vipande vipande, vipande vya dini hii, vipande vya kabila hili ama lile.”

Rais Kikwete amesema kuwa katika kuondoa ubaguzi huo, viongozi wana wajibu mkubwa zaidi na maalum. “Watu wanatusikiliza, watu wanatuamini, watu wanatufuata. Hivyo, tuhimize watu kuishi kwa pamoja.”

Rais Kikwete pia amesema kuwa Mwalimu alisimamia maadili ya uongozi. “Alichukia rushwa, alichukia uonevu.

Wakati huo tulikuwa na miiko ya uongozi. Lakini miiko hii iliundwa kwa msingi ya kijamaa. Sasa tuko katika uchumi wa soko na ndiyo maana tunajaribu kuweka misingi ya maadili ya uongozi inayoendana na mazingira ya sasa. Tunaandaa miswada miwili ya kuleta miiko mipya ya uongozi katika mazingira mapya.”