mtoto wa fundikira alazwa muhimbili kwa kupigwa

Swetu Fundikira, mtoto wa nduguye Chifu Abdallah Fundikira, yuko hospitali ya Taifa ya Muhimbili kitengo cha mifupa (MOI) jijini Dar alikolazwa usiku wa kuamkia leo kufuatio kipigo cha mbwa mwizi alichokipata toka kwa watu wanne, mmoja mwanamama, wanaosemekana kuwa ni wanajeshi wa Jeshi la Ulinzi.

Habari zinasema watu wanne hao wanaotuhumiwa kufanya kitendo hicho wamefunguliwa mashtaka kituo cha polisi cha Oysterbay wakati uchunguzi ukiendelea. Na wao pia inasemekana wamegfungua mashitaka dhidi ya Swetu ya kufanyiwa fujo na kutukanwa.

Hivi sasa Swetu Fundikira yuko ICU hapo MOI akifanyiwa uchunguzi wa kina kutokana na kipigo hicho, ambapo uchunguzi wa awali unaonesha amevunjwa taya na uso wake hautamaniki kwa uvimbe.

Kaka wa mjeruhiwa, Ismail Fundikira, amethibitisha habari hii sasa hivi na kwamba ndugu, jamaa na marafiki wamekusanyika hospitali wakimuombea ndugu yao ambaye yuko katika hali mbaya sana.

Ismail hakuweza kuweka bayana chanzo cha yote hayo, akisisitiza kwamba polisi wako kazini na hawezi kuwaingilia katika uchunguzi. Hata hivyo habari zinasema sakata lilianza pale Swetu na mwenzie mmoja ambaye jina lake halijatambulika walipokuwa wakitoka dansini usiku maeneo ya Kinondoni na kujikuta wanapambana na gari ingine barabarani ambalo inasemekana liliwachomekea na kisha kusimama mbele yao na kuwaziba.

Walipotoka kujihami kwa dhana labda ni majambazi, makonde yakaanza na mwenzie alipoona wanazidiwa nguvu akakimbia kuomba msaada. Walipofika eneo la tukio wakakuta Swetu hayupo na gari la hao waliogombana nao halipo.

Baada ya kuhahah huku na kule wakapata habari kwamba Swetu yuko kituo kidogo cha Salender ambako walipokwenda wakapata habari kwamba watuhumiwa walimchukua hadi kituo cha mabasi cha Palm Beach na kuanza kumpiga. Bahati nzuri dereva wa teksi aliyekuwa anapita hapo akakimbilia kituo cha polisi cha Salender na polisi wakaja kumuokoa Swetu na kumkimbiza hospitali akiwa hoi bin taabani.

Ndugu wa Swetu wameshafungua mashtaka na watuhumiwa inasemekana wamewekwa korokoroni. Habari zingine zitafuata kadri zitavyopatikana.