mwandosya atembelea mkoa wa pwani kugagua miradi ya maji

Waziri wa Maji na Umwagiliaji Profesa Mark Mwandosya na mbunge wa Kibaha Mh. Dk. Ibrahim Msabaha na Mkuu wa Wilaya ya Kibaha Vijijini Mh. Halima Kihemba wakiangalia bomba jipya la maji Soga leo. Chini akiongea na wakazi na viongozi wa hapo

Waziri wa Maji na Umwagiliaji Profesa Mark Mwandosya amewaambia wakazi wa Kijiji cha Soga mkoani Pwani kuwa Serikali haijawasahau hasa katika upande wa tatizo la Maji.

Waziri Mwandosya ameyasema hayo leo alipokuwa katika ziara ya siku moja mkoani Pwani kuangalia miradi mbalimbali ya Maji, na kuongeza kuwa changamoto ya maeneo ya Pwani ni shida ya maji kutokana na sababu mbalimbali ikiwemo ile ya mkoa wa Pwani kuwa karibu na bahari ya Hindi hivyo kusababisha maji yanayopatikana sehemu kubwa kuwa ni ya chumvi.

Hata hivyo Waziri Mwandosya ameongeza kuwa licha ya tatizo hilo la maji kuwa ya chumvi bado wakazi wa Pwani wana bahati kwa kuwa Mto Ruvu upo katika mkoa wao na maji huwa yanapatikana karibu kipindi chote cha mwaka.

Aliongeza kuwa hivyo kiasi cha maji kinachopatikana katika Mto huo kitagawanywa pande zote Mkoa wa Pwani na Mkoa wa Dar es saalam, ili watu wote wafaidi huduma hiyo ya maji.

Wakazi wa Soga awali walimweleza Waziri Mwandosya kuwa kilio chao kikubwa ni tatizo la maji na kumuomba kuhakikisha anawatatulia tatizo hilo kwa kuwa wizara yake ndio yenye dhamana hiyo.

Akiwajibu kuhusiana na hilo Waziri Mwandosya aliwahakikishia kuwa mradi wa maji unaendelea hivi sasa katika vjiji 10 mkoani Pwani chini wahandisi kutoka china, wataalam hao hawataondoka mpaka wawe wameshawapatia wananchi huduma za maji katika maeneo yote husika.

Katika ziara hiyo Waziri Mwandosya aliongozana na Mkuu wa Wilaya ya Kibaha Bi Halima Kihemba, Mbunge wa Kibaha Vijijini Dk.Ibrahim Msabaha, Mtendaji Mkuu wa DAWASA Archard Mutalemwa, Mtendaji Mkuu wa DAWASCO Alex Kaaya na viongozi wengine kutoka Wizara ya Maji na Umwagiliaji na Mkoa wa Pwani .

Waziri Mwandosya alitembelea Shule ya Sekondari ya Al Akbar Hashem Rafsanjan , shule ya Msingi Soga, Stesheni ya Reli ya Soga, Shamba la Mkonge la Alavi pamoja na shamba la Mhe Dk Msabaha .