yale yaleeeee.....

Habari ankal,

Ebwana mimi tatizo langu ni hawa Tanesco, ni takribani wiki mbili na siku kadhaa sasa umeme unakatika kuanzia saa moja na dakika kumi na kurudi baada ya saa moja au mawili. Tatizo hili liko huku kwetu Mwenge na maeneo jirani sijui sehemu zingine za jiji hali ikoje.

Hatujui tatizo ni nini maana tulikuwa tumeshaanza kuiona Tanesco kama shirika linaloanza kustaarabika kwa kuongozwa na watu wenye upeo wa juu wanaotambua umuhimu wa wadau wa upande wa pili ambao ni sisi watumiaji au wateja japo kwa kutupatia taarifa za makatizo ya umeme kila inapowezekana.

Natambua kuwa kuna shughuli zao zingine huwa ni za kidharula zaidi hivyo huwa ni vigumu kuzitolea taarifa, sasa swali ni je hii kata umeme ya kila siku majira ya saa moja jioni maeneo ya Mwenge nayo ni dharula au kitu gani? Inasikitisha sana pale unaporudi kutoka kazini halafu unafika nyumbani usikute umeme na joto la Dar lilivyo juu.

Ushauri wangu kwa Tanesco ni kwamba kila kitu kina mwisho, nadhani watakumbuka ukiritimba wa enzi zile za posta na simu, enzi za kuomba line posta halafu unasubiri masaa manne au zaidi.

Sijui wadau wa pande zingine za jiji wanakumbana na hii kero au ni sisi tu huku, au sijui tunaadhibiwa kwa vile Kakobe anapatikana huku na kawatilia ngumu kupitisha waya ingawa yeye si mteja wao kwa vile anajiungurumishia mjenereta masaa 24 siku 365 za mwaka!

Swali je, hivi bodi ya wakurugenzi na mkurugenzi mtendaji wa Tanesco wangekuwa wanachaguliwa kwa kura kama madiwani na wabunge mwezi wa kumi nao wangejitokeza majukwaani kutuomba kura?

Ni hayo tu, nawasilisha!

Mdau
Mwenge Kwa wastaarabu