ajali ya daladala mwanza leo

Na Ripota wa Globu ya Jamii, MWanza

Habari za kazi mkuu wa blog ya jamii. Ni matumaini kuwa wikiendi imeenda sawa kwa upande wako. Hapa Mwanza nimekuta ajali moja mbaya sana ambayo ni asilimia mia uzembe na tusimsingizie Mungu. Kipanya kinachosafirisha abiria kati ya Airport na Buhongwa kimegogana uso kwa uso na gari la samaki aina ya isuzu zile ndogo za kama tani 3 hivi.

Ilikuwa hivi: daldala ilitokea Buhongwa na gari la samaki lilitokea mjini kati. Kwenye mlima wa Nyegezi kabla ya kufika Nyegezi kona ukitokea mjini, daladala lilikuwa nyuma ya gari ndogo aina ya saloon na nyuma yake ikija pickup ndogo ya tani moja. Dereva wa daldala akalazimisha kuipita saloon bila kuzingatia kama ni kwenye kona ndogo. Kabla hajamalizia ndipo akakutana na hiyo isuzu na kugongana uso kwa uso.

Dereva wa pickup alijaribu kukanyagia breki lakini hakuweza kusimama na hivyo kuigonga daladala kwa nyuma japo kwa mshindo mdogo tu.

Habari alizotoa shuhuda mmoja ni kwamba dereva wa daladala amekatika mguu na anatapika damu na hali yake ni mbaya sana, wakati Yule wa isuzu naye hali yake nayo ni mbaya vilevile. Hakuweza kunidokezea kama kuna majeruhi wengine na wameathirika kiasi gani. Ila kama unavyoona picha inasikitisha.

Tunajifunza mambo kadhaa hapa:
· Tusidharau sheria- kwa nini ametaka kupita gari nyingine wakati si sehemu salama
· Tuzingatie sheria – angalau mita tano kutoka kwenye gari iliyoko mbele yako (mwenye pickup hakuzingatia hilo)
· Bumps barabarani ni kielelezo cha mfumo wa usalama barabarani kushindwa-elimu na kutekelezwa kwa sheria kutafanya kazi zaidi kuliko matuta ya barabarani na vidhibiti mwendo. Mfano wa mtoto aliyefunzwa vizuri huwa na tabia nzuri kuliko mtoto aliyefunzwa kwa viboko
· Tuangalie mfumo wa jeshi la polisi upya na kama namna gani ni wakati muafaka wa kulivunja na kuanza upya. Bahati mbaya ni mfumo mzima wan chi na siyo jeshi tu.