pinda afafanua tamko la kusitisha bomoa bomoa

Waziri Mkuu Mh. Mizengo Pinda akiwa na Waziri wa Ardhi, Nyumba na Makazi Profesa Anna Tibaijuka na Waziri wa Ujenzi Dkt. John Pombe Magufuli, pamoja na Mama Tunu Pinda, kwenye mpaka wa wilaya ya Chato na Muleba alipokuwa ziarani Kagera. Picha na Chris Mfinanga

Waziri Mkuu Mizengo Pinda wakati akikamilisha ziara yake mkoani Kagera, amelazimika kutoa ufafanuzi wa kauli yake, ili kujibu malalamiko ya baadhi ya wananachi na hasa wachambuzi wa masuala ya kisiasa ambao wamekuwa wakimlaumu kwa kumtumia ujumbe hadharani Waziri wa Ujenzi, Dk. John Magufuli akimtaka kusimamisha zoezi la bomoa-bomoa. Hatua hiyo ilitafsiriwa kuwa Serikali haina kauli moja.

Waziri Mkuu Mizengo Pinda, amesema Serikali imelazimika kusitisha zoezi la bomoabomoa lililokuwa likiendelea nchini kwa sababu yapo mambo ambayo yanahitaji kuchukuliwa hatua na Serikali.

Alisema yanatakiwa kuwepo maelewano na kutoa elimu zaidi kwa wananchi kwa sababu Serikali ndiyo imewaacha watu wakajenga katika maeneo hayo huku wakijua wazi kabisa kuwa sheria ipo na walitakiwa kuwazuia wasindelee kujenga kwani sheria inayokuja leo ni kwa ajili ya vizazi vijavyo.

“Sheria inayotumika ni ya mwaka 1937, tunapaswa tuwaelimishe wananchi sheria inasema nini. Katika hali hii, tunapaswa tuangalie zoezi zima linavyoendeshwa sababu kuna watu wamejinyima wakajenga makazi yao ya kudumu, kuna watu wamewekeza miradi katika maeneo haya, hakuna aliyewazuia wasijenge japo sheria ilikuwepo...” alifafanua Waziri Mkuu.

Kufuatia malalamiko toka sehemu mbalimbali nchini, Waziri Mkuu, Mizengo Pinda amewaagiza Wakuu wa mkoa yote kupeleka taarifa ya barabara zinazojengwa kwenye maeneo yao ili kubaini ni nyumba ngapi zitakazoathirika na bomobomoa hiyo na athari zake katika maeneo husika.

“Nimemwomba kila mkuu wa mkoa alete orodha ya barabara ngapi zinajengwa sasa, ngapi zinatarajiwa kujengwa, nyumba ngapi zitaathiriwa na operesheni hizo; ngapi zilijengwa kabla ya sheria kupitishwa… nataka tupate taarifa inayoonyesha mchanganuo wa maeneo ya mijini na vijijini,” alisema.

“Lazima tuangalie makazi ya watu yalivyojengwa, tuangalie athari zake zikoje, athari haziwezi kuwa uniform katika maeneo ya mijini na vijijini… tutafute njia mbadala na kujiuliza, je hapa hatuwezi kupindisha barabara ili kuepuka balaa la kuwabomolea watu na serikali kuingia gharama za kulipa fidia.”

Pinda alisema katika maeneo mengi, awali sehemu ya hifadhi ya barabara ilikuwa ni mita 22 na baadaye ikaongezwa hadi mita 30 za eneo la barabara ambapo yapo pia majengo ya taasisi za umma na ya huduma za kijamii kama vile hospitali, benki, misikiti na makanisa ambayo huenda yalijengwa zaidi ya miaka 20 iliyopita baada ya kuomba ardhi na kupewa, na leo kuibuka na kuambia kuwa majengo hayo yako kwenye maeneo ya hifadhi ya barabara na kutakiwa wabomoe ni suala ambalo linahitaji umakini wa hali juu ikiwa ni pamoja na kutoa elimu na mashauriano,

“Hebu fikiria kama eneo la hifadhi ya barabara kuna majengo ya makanisa kama Lutheran, Roman Catholic, msikiti … halafu maaskofu wa makanisa hayo pamoja na sheikh wapangane kuja kwako kulalamikia suala hilo, wakati waliomba ardhi na kupewa na Serikali hiyo hiyo ambayo ina sheria hiyo inayozuia ujenzi katika eneo hilo, unafanyaje? ni taabu tupu ...ahh...ngoma hapo,”alisema Bw. Pinda, “Je tuzibomoe zote hizo kwa sababu sheria inasema hivyo?,” alihoji na kuongeza kuwa, “inabidi tufanye tathmini!”