Just in: 15 wapoteza maisha katika ajali ya basi la sumry huko mbarali, mbeya

Mabaki ya basi la kampuni ya Sumry yakiondolewa eneo la tukio huku yakifichwa kwa turubai kama walivyonaswa na camera ya blogu hii ya www.francisgodwin.blogspot.com leo
Haya ni mabaki ya basi hilo na hili ni paa la basi hilo likiwa limetengana na chesesi lake
Na Francis Godwin
Vibaka wamepora mali maiti pamoja na majeruhi wa ajali ya basi la Sumry lenye namba za usajiri T 949 BCT aina ya Nissan Diesel iliyotokea jana eneo la Igwawa wilayani Mbarali mkoani Mbeya.

Katika ajali hiyo watu 15 walikufa papo hapo na mmoja kufia hospitali ya Rujewa wilayani Mbarali huku watu zaidi ya 15 wakijeruhiwa vibaya katika ajali hiyo.

Baadhi ya majeruhi na ndugu wa jirani na marehemu waliopoteza maisha katika ajali hiyo walisema kuwa baadhi ya mali walizokuwa nazo zikiwemo fedha ziliporwa na vibaka waliofika katika eneo hilo ambao baadhi yao ni madereva wa magari yaliyosimama kutoa msaada katika eneo hilo.

Mmoja kati ya ndugu hao aliyejitambulisha kwa jina la Yohana Samson alisema kuwa rafiki yake ambaye amekufa katika ajali hiyo alikuwa na Laptop yake pamoja na fedha zaidi ya shilingi milioni 2 ambazo alikuwa ameziweka katika mkoba huo wa Laptop na kuwa baada ya ajali alijitokeza mtu ambaye alifika kwa ajili ya kutoa msaada na kuondoka na mkoba huo na fedha.

Hata hivyo alisema eneo hilo ambalo ni mbali na mji wa Igawa na ni pori ilikuwa vigumu kwa wananchi wa eneo hilo kufika na kuwa wahusika wakuu wa tukio hilo la wizi ni madereva na baadhi ya wenyeji wachache waliofika kusaidia kuokoa majeruhi .

Majeruhi huyo pia ameeleza kuwa chanzo cha ajali hiyo na dereva wa basi hilo la Sumri kutaka kufukuzana na basi la kampuni ya Hood ambalo lilikuwa mbele yao na kuwa kama si kufukuzana huku huenda taili hilo lisingepasuka .

Hivyo alitoa lawama zake kwa Sumatra kutokana na kutoka muda wa dakika 10 kwa mabasi hayo kuanza safari katika stendi kuu ya Arusha na ile ya Mbeya na kuwa ni vema Sumatra kutoa muda wa saa moja zima kwa basi moja kuondoka kabla ya jingine kutoka stendi ili kupunguza ligi kwa mabasi hayo .

Kamanda wa Polisi Mkoa wa Mbeya, Advocate Nyombi emethibitisha kutokea kwa ajali hiyo na kuwa ajali hiyo imetokea eneo la Igawa wilayani Mbarali mkoani Mbeya mpakani mwa mkoa wa Iringa na Mbeya.

Alisema kati ya waliokufa, wanaume ni watano na wanawake ni watano ambao hata hivyo majina yao bado hayajapatikana na maiti zimehifadhiwa katika Hospitali ya Wazazi Meta Mbeya.

Aliwataja waliokufa kuwa ni dereva wa basi hilo, Makame Juma, Frolence Kitaule Mwalimu wa shule ya Msingi Ubaruku wilayani Mbarali,Thomas Mchalo Mwanafunzi wa Chuo Kikuu cha Mzumbe.

Wengine Bupe Mwaijumba, Magreth Komba ambaye ni Muuguzi katika hospitali ya wazazi Mbeya pamoja na mumewe aitwaye Kandi Komba.

Alisema watu saba waliokufa katika ajari hiyo bado hawajatambuliwa na miili yao imehifadhiwa katika Hospitali ya Wazazi Meta ambapo ndugu na jamaa hadi kufika saaa 6;30 mchana walikuwa wakiendelea kumiminika katika hospitali hiyo kutambua waliokufa.

Kamanda Nyombi alisema majeruhi 11 wa ajari hiyo wamelazwa katika hospitali ya Wilaya ya Rujewa-Mbarali na mmoja katika hospitali ya Ilembula na hali zao zinaendelea vizuri.

Aliwataja majeruhi hao kuwa ni Twarib Fakiri, Lupi Mwaipalo, Martine Costantine (25) mkazi wa Moshi, Thadeus Logate (43) Mkazi wa Soweto, Andrew Adolf (6), Ezekiel Adolf ambaye ni mwanafunzi wa Shule ya Sekondari Meta iliyopo Jijini Mbeya.

Majeruhi wengine ni Riziki Chuwa (25) mkazi wa Mbeya, Erasto Kiwaga (25), mkazi Mbeya, Hassan Mohamed mkazi wa Iringa,Bakari Zayumba mkazi wa Dar es Salaam na Halima Abdallah.

Hata hivyo Kamanda Nyombi alisema chanzo cha ajali hiyo kilitokana na kupasuka tairi la mbele upande wa kushoto. Alisema baada ya tairi kupasuka basi hilo liliseleleka na kuacha njia na kuinduka.