Bila kilimo cha umwagilijai hakuna tija kwenye kilimo- Waziri Maghembe

Waziri wa Kilimo Chakula na Ushirika, Profesa Jumanne Maghembe akipata maelezo kutoka kwa Mwakilishi wa Kampuni ya Jain Irrigation System ya India Bwana Anirudha Barwe namna umwagiliaji wa matone wenya gharama nafuu unavyofanya kazi kwenye Maadhimisho ya Sikukuu ya Wakulima, Nane Nane katika viwanja vya Nzuguni, Manispaa ya Dodoma leo.

Na Issa Sabuni, WKCU

Waziri wa Kilimo Chakula na Ushirika, Profesa Jumanne Maghembe leo alitembelea Banda la Kampuni ya Jain Irrigation System ya nchini India na kujionea namna Kampuni hiyo ilivyojipanga katika kuwawezesha wakulima wa Tanzania ili watumie teknolojia mbalimbali za kilimo cha umwagiliaji.

Katika banda la Kampuni ya Jain Irrigation System, Waziri Maghembe alionyeshwa teknolojia ya umwagilijai wa kusambaza mipira juu ya shamba “surface irrigation”, umwagiliaji wa kunyunyizia “overhead/sprinkler irrigation” na wa kupitisha mipira na mabomba chini ya ardhi “sub surface irrigation”.

Waziri Maghembe alimweleza Mwakilishi mkazi wa Kampuni hiyo Bwana Anirudha Barwe kuwa mpango kabambe wa Taifa wa umwagiliaji unalenga kulifanya taifa lijitosheleze kwa chakula na kuongeza kuwa hekta milioni 29.4 zinafaa kwa kilimo cha umwagiliaji huku hekta milioni 2.3 zina uwezo mkubwa wa kuendelezwa na hekta milioni 4.8 zina uwezo wa kati wa kuendelezwa.

Waziri Maghembe aliongeza kuwa licha ya changamoto zilizopo Serikali imeimarisha kilimo cha umwagiliaji nchini kwa kuongeza eneo linalotumiwa kwa kilimo cha umwagiliaji kufikia hekta 345,690 katika skimu za umwagiliaji 2,006 zilizosambaa mikoa yote nchini.

Aidha, Waziri Maghembe alimweleza mwakilishi huyo kuwa azma ya kukifanya kilimo cha Tanzania kuwa na tija na manufaa kwa mkulima wa Tanzania ni kazi ya Serikali na wadau wengine kama Jain Irrigation System.

“Lengo la Serikali si kujitosheleza kwa chakula tu lakini pia kuhakikisha kuwa mkazo unaongezwa katika kuzalisha mazao yenye thamani kubwa kama mboga na matunda na tutafanikiwa kama wakulima wataitumia rasilimali maji ipasavyo.” Alikaririwa Waziri Maghembe.

Aliongeza kuwa kilimo cha umwagiliaji kina tija kubwa kama rasilimali maji itatumika ipasavyo sambamba na teknolojia nyingine za kilimo bora na kutolea mfano Jimbo la Andhra Pradresh linavyozalisha ndizi za kutosha soko la ndani la India na la dunia na kuifanya nchi hiyo kuwa mzalishaji wa kwanza duniani.

Aidha, Waziri Maghembe alifurahishwa unafuu wa bei za Kampuni hiyo kuanzia wakati wa kuandaa shamba na hatmae kufunga miundombinu na mitambo ya kilimo cha umwagilijai lakini alimwomba Mwakilishi mkazi wa Kampuni hiyo kuendelea kumfiria mkulima mdogo ili kumpa unafuu zaidi.