Zanzibar yapiga marufuku uingizaji wa ndizi toka Bara

NA NAFISA MADAI -MAELEZO,ZANZIBAR

WIZARA ya kilimo mali asili zanzibar imepiga marufuku uingizaji wa bidhaa ya ndizi,miche ya migomba,majani ya migomba pamoja vigogo vya mgomba kutoka tanzania bara.

Akitoa taarifa hiyo kwa vyombo vya habari huko ofisini kwake mwanakwerekwe wilaya ya magharibi, mkuu wa kitengo cha uhifadhi na utibabu wa mazao, Bi. Zainab Saliim Abdallah amesema taarifa hiyo imefuatia na kuibuka maradhi mnyauko ambayo yanasababishwa na bakteria katika migomba huko tanzania bara.

Aidha amesema maradhi hayo tanzania bara yameingia tokea mwaka 2007 lakini kama idara inajukumu la kuwakumbusha wananchi wa zanzibar kwa vile kipindi hiki cha ramadhani walaji huwa wengi zaidi kuliko siku za kawaida.

Hata hivyo alisema maradhi hayo hayana athari kwa mlaji bali athari kubwa anaweza akaipata mkulima wa zanzibar endapo bidhaa hiyo ikizidi kuingia chini kwani alisema huwenda ikamsababishia hasara kubwa mkulima huyo kwa asilimia mia moja.

Bi Zainabu aliwaomba wanzanzibar kutoa mashirikiano makubwa na kuwatafuta wale ambao bado watakwenda kinyume na agizo hilo ili kuweza kudhibiti uingizaji wa bidhaa hiyo.

Sambamba na hayo Bi Zainabu alisema mtu yoyote ataekamatwa anahusika na uingizaji wa bidhaa hiyo kutoka bara atafikishwa katika vyombo vya sheria na sheria itashika mkono wake kwa muingizaji huyo.

Amesema kitengo chake tayari kimeshakamata ndizi ambazo zimebainika na maradhi hayo kutoka bara na mipango inaandaliwa kuangamiza ndizi hizo ili iwe fundisho kwa wengine ambao wanampango wa kuingiza ndizi zanzibar.

Akizungumzia nzi wa matunda,Bi Zainabu amesema nzi hao hivi sasa wameshamiri sana zanzibar na wanashambulia embe kwa kiasi kikubwa jambo ambalo limekua likiwavunja moyo wakulima wa zao hilo visiwani zanzibar.

Aidha alisema nzi hao ambao chimbulo lake ni nchini indonesia wamekua wakileta hasara kubwa kwa wakulima kwani soko limekua dogo sana ukilinganisha na hapo awali.

Hata hivyo alisema juhudi zinafanywa za kuangamizwa nzi hao za kuwawekea mitego maalum na kwasasa tayari wameanza katika wilaya ya kusini na wamefanikiwa kwa asilimia hamsini ambapo zoezi hilo linategemewa kufanya katika mikoa yote ya zanzibar.

Bi Zainabu pia alizungumzia mende wadogo ambao nao wameshamiri kwa wingi katika visiwa vya unguja amesema mende hao wanaathiri sana katika makaazi ya watu kwani hushambulia nguo na vitu vyengine majumbani.

Amesema kuwa mende hao wametokea ulaya na wamekuja kutokana na vifaa vya umeme ambavyo vimezagaa katika manispaa ya mji wa zanzibar.

Aidha alisema juhudi za makusudi zinachukulia za kutokomeza mende hao maarufu mende wa ulaya, na kuwaasa wale wote wanaofanya biashara hiyo ya vifaa vilivyokwisha tumika kuangalia kwa makini vifaa hiyo kwani athari yake baadae inaweza kuwa kubwa zaidi.