Mhariri Mtendaji wa Tanzania Daima afikishwa mahakamani

Mhariri Mtendaji wa Tanzania Daima na Mwenyekiti wa Jukwaa la Wahariri Bw. Absalom  Kibanda akiongea na wanahabari wakati wa msiba wa Mwanahabari Danny Mwakiteleko siku zilizopita

Na Mwandishi wetu, 

Mahakamani Kisutu

Waandishi wa habari wa vyombo tofauti tofauti leo walijaa katika Mahakama ya Hakimu Mkazi Kisutu muda mfupi uliopita kusikiliza kesi inayomkabili mwandishi mwenzao ambaye ni Mhariri Mtendaji wa gazeti la Tanzania Daima,  Bw. Absalom Kibanda (45).

Kibanda aliunganishwa leo katika kesi inayomkabili Samson Mwigamba (36) ya kuchapisha habari katika gazeti hilo habari inayodaiwa kuhamasisha askari kutotii amri ya wakuu wao wa kazi ambao ni mamlaka halali.

Mwigamba ilidaiwa kuwa hakuwepo mahakamani alikuwa Arusha ambako anakabiliwa na kesi nyingine namba 5/2011 kwa mujibu wa taarifa iliyotolewa na wakili wake Mhozya John. 

Akisomewa mashitaka Mhariri Kibanda alidaiwa na wakili wa serikali Beatrice Kagonda mbele ya hakimu Stuwart Sanga, kuwa Novemba 30 mwaka huu alitoa habari katika gazeti lhilo yenye kichwa cha habari kisemacho “Waraka Maalum kwa Askari wote” habari ambayo inahamasisha askari kutotii mamlaka halali.

Baada ya kusomewa mashitaka hayo, Kibanda alikana mashitaka na jopo la mawakili linalomtetea, wakili Deo Ringia, Isaya Matambo, Juvenalis Ngowi na Nyaronyo Kicheere waliomba dhamana kwa mteja wao.

Hakimu Sanga alisema masharti katika kesi hiyo ni yale yaliyowekwa Desemba 8 mwaka huu kesi hiyo ilipokuja kwa mara ya kwanza kwa mshitakiwa wa kwanza (Mwigamba.)

kuwasilisha hati ya mali isiyoamishika yenye thamani ya shilingi milioni tano na kuwa na wadhamini wawili ambao watasaini hati ya dhamana ya Sh milioni tano kila mmoja, mashalti mengine ni kusalimisha hati ya kusafiria na kuripoti Polisi kati kila mwezi.

Mwigamba anadaiwa Novemba 30 mwaka huu, toleo Na.2553 lilichapisha safu hiyo iliyokuwa na kichwa cha habari  “Waraka Maalum kwa Askari wote”  

Mwigamba alifikishwa mahakamani Desemba 8 mwaka huu na kusomewa mashitaka hayo alidaiwa kuandika makala  inayotoa ushawishi kwa jeshi nchini kutotii wakuu wao halali kinyume cha sheria. ya Kanuni ya Adhabu. Mwigambaanaandika Safu ya Kalamu ya Mwigamba, safu inayotoka kila Jumatano katika gazeti la Tanzania Daima, 

, Kesi hiyo imepangwa itajwe Januari 19 mwaka huu kwa kuwa upelelezi katika kesi hiyo haujakamilika.

KUPATA MAKALA HUSIKA PAMOJA NA 
TAMKO LA JUKWAA LA WAHARIRI
BOFYA HAPA