Waziri wa Afya na Ustawi wa Jamii kuanza kuzipitia taasisi zilizo chini ya Wizara yake

Na.Catherine Sungura.MOHSW

Waziri wa Afya na Ustawi wa Jamii Dkt. Hussein Mwinyi amesema anapitia taasisi zote zilizopo chini ya wizara yake  ili kusikiliza mafanikio na kujua matatizo yanazozikabili taasisi hizo  ili kuweza  kuboresha  huduma  katika sekta  ya afya nchini pamoja na kupanga mipango mizuri katika  kuendeleza taasisi hizo.

Dkt. Mwinyi amesema hayo leo kwenye ziara   yake na kuzungumza na wafanyakazi wa Taasisi ya Chakula na Liche  Tanzania (TFNC).

“Lazima tujiulize uwepo wa taasisi hii,mwanzoni taasisi hii ilikuwa inajikita na utapiamlo, kwa sasa kuna magonjwa yasiyo ya kuambukizwa ,alitaja mfano wa magonjwa haya ni moyo,kisukari na mengineyo magonjwa haya mapambano yake  ni kinga,na wataalamu wa kutoa kinga ni nyinyi,hivyo masuala ya lishe ni muhimu kabla ya kuanza kuyatibu.

Aidha Dkt. Mwinyi alisema wizara yake ina kila sababu ya kuyapa kipaumbele masuala ya lishe nchini licha ya ufinyu wa bajeti wanayoipata, “ipo haja ya kujipanga upya  na kufanya kitu cha ziada ili kupunguza kiwango cha utapiamlo nchini  pamoja na upungufu wa wekundu wa damu kwa wanawake wenye umri wa kuzaa ambapo inachangia vifo vya akina mama wajawazito nahii inachangia na akina mama wengi  kutokuwa na elimu na mafunzo juu ya lishe  na hivyo nchi kuwa nyuma na kutofikia malengo ya millennia ya kupunguza vifo vya akina mama wajawazito nchini.

Awali  Kaimu Mkurugenzi Mtendaji  wa taasisi hiyo  Benetict  Jeje alisema  taasisi yake ina changamoto ya kuhakikisha kuwa huduma za lishe nchini zinapanuka na kuwafikia wananchi wengi hasa waishio vijijini , hivyo serikali kuamua kuajiri maafisa lishe  katika halmashauri 106 kati ya 168 na mikoa 11 imefanya hivyo.

“Lishe ni suala mtambuka na linalogusa maendeleo ya kijamii, kiuchumi na maendeleo ya nchi kwa ujumla,ushiriki wa sekta mbalimbali  katika kukabliana na changamoto za lishe nchini ni jambo lisiloepukika”alisema Jeje.

Hata hivyo alisema taasisi yake kwa kushirikiana na  wadau mbalimbali zimechangia kupunguza kwa kiwango cha utapiamlo nchini kati ya mwaka 1999 na 2010.Asilimia 16 ya watoto wenye umri chini ya miaka mitano wana uzito pungufu,asilimia 5 ni wakondefu na asilimia 42 wana udumavu na upungufu wa damu unaathiri asilimia 69 ya watoto wakati upungufu wa vitamin A ni asilimia 33.