BENKI YA MAENDELEO AFRIKA (AFDB) KUENDELEA KUENDELEA KUSAIDIA UCHUMI TANZANIA

Imeelezwa kuwa Tanzania ni moja ya nchi zinazofaidika na fedha kutoka benki ya Maendeleo Afrika (AFDB), hii ni kutokana na matokeo ya utendaji kazi wa kuridhisha katika matumizi ya fedha za miradi. 

Hayo yamesemwa na mwakilishi wa benki ya AfDB nchini Bi,Tonia Kandiero wakati alipokutana na uongozi wa Wizara ya Nishati na Madini, ukiongozwa na Waziri, Profesa Sospeter Muhongo kwa lengo la kuzungumzia ushiriki wa benki hiyo katika uendelezaji wa sekta ya nishati nchini.

  Kutokana na umuhimu wa Nishati kwa ajili ya kuinua uchumi wa nchi, Benki ya AfDB katika awamu nyingine ya fedha inayoanza mwaka 2014 inatarajia kutenga Dola za Marekani milioni 600 au zaidi kwa ajili ya kuendeleza sekta mbalimbali nchini ambapo nusu ya fedha hizo itatengwa kwa ajili ya kuendeleza sekta ya Nishati.

 Waziri wa Nishati na Madini, Profesa Sospeter Muhongo na Katibu Mkuu Wizara ya Nishati na Madini, Bw.Eliakim Maswi wakiwa kwenye mazungumzo  na Mwakilishi wa Benki ya Maendeleo Afrika nchini, Bi.Tonia Kandiero ambaye aliongoza ujumbe wa wataalam kutoka Benki hiyo kwa ajili ya mazungumzo kuhusu upatikanaji wa fedha za kuendeleza sekta ya Nishati nchini.

Waziri wa Nishati na Madini, Profesa Sospeter Muhongo na Katibu Mkuu Wizara ya Nishati na Madini, Bw.Eliakim Maswi  wakiwa pamoja na wataalam wa Wizara ya Nishati na Madini na Benki ya Maendeleo Afrika (AfDB) wakijadili kuhusu ushiriki wa Benki ya hiyo katika uendelezaji wa sekta ya Nishati nchini.