Diwani awanusuru wanafunzi kuanguka shuleni

Mganga wa jadi Aweso Kipaku ambaye ni diwani wa kata ya Mswaha iliyopo wilayani Korogwe, akiwa ameshikilia kitu kinachodaiwa ni jini alilolitoa katika moja ya darasa la shule ya msingi Kwemsala iliyopo kata ya Mtindiro wilayani Muheza juzi, wengine aliyevaa fulana ya punda milia ni mwenyekiti wa kamati ya shule hiyo Shabani Hamisi.

Na Mashaka Mhando,Muheza

DIWANI wa kata ya Mswaha iliyopo wilayani Korogwe, Aweso Kipaku amefanya kazi ya kuwanusuru wanafunzi wa shule ya msingi Kwemsala iliyopo kata ya Mtindiro wilayani Muheza, waliokuwa wakianguka kutokana na kuwepo madai ya imani za kishirikina.

Akifanya kazi hiyo, juzi katika shule hiyo Diwani huyo aliyealikwa na kamati ya shule ya kijiji hicho, alianza kupita kila darasa la shule hiyo huku akionekana amepandisha mapepo yaliyokuwa yakimuongoza huku wananchi wa kijiji hicho wakijazana kuona kazi anayofanya diwani huyo.

Diwani huyo mara baada ya kukimbizana na vitu vilivyokuwa havionekani kwa macho, alipoingia kwenye ofisi inayokaliwa na walimu, alipiga kelele kutaka aletewe unga wa sembe, maji na kuku alipopata vitu hivyo, aliibuka na pembe kubwa iliyokuwa imefungwa vitambaa vyeupe na vyekundu.

"Wananchi hivi vitu vilivyotoa mnavyoviona ndivyo vilivyokuwa vikiwasumbua wanafunzi, lakini jini jingine kubwa limekimbia huko katika makazi...Kazi ya kupambana nalo nitaifanya kesho (Ijumaa iliyopita)," alisema diwani huyo huku akiwa amekishika mkononi.

Akizungumza na wananchi mara baada ya diwani huyo kutoa vitu hivyo, Mwenyekiti wa kamati ya shule Shaban Hamis alisema tatizo la wanafunzi kuanguka katika shule hiyo lilianza tangu mwaka juzi na walipoitisha mkutano wa kijiji, viongozi wa dini walisema wangefanya maombi kuwanusuru watoto hao, lakini hawakuweza kufanya maombi hayo.

"Tuliona watoto wetu wanaendelea kuanguka wakipelekwa hospitali wanelezwa wana matatizo ya kisaikolojia, lakini tukiwapeleka kwa waganga wa kienyeji wanatibiwa na kupona, tukaona ni vema tumlete mganga huyu Kipaku (Diwani) ili awanusuru watoto wetu," alisema mwenyekiti huyo.

Mwalimu mmoja shuleni hayo Sophia Msangeni, alisema tatizo la wanafunzi kuanguka limekuwa likisababisha kushuka kwa taaluma shuleni hapo hatua ambayo ilikuwa ikileta kero na usumbufu mkubwa mara inapotokea suala la watoto kuanguka ambapo kwa siku wanaanguka watoto 20.