NEWS ALERT: WATUHUMIWA 10 WA MAUAJI YA DK. MVUNGI WAPANDISHWA KIZIMBANI LEO

 Watu 10 wanaotuhumiwa na mauaji ya Mjumbe wa Tume ya Mabadiliko ya Katiba, Marehemu Dkt. Edmund Sengondo Mvungi (pichani) , leo walifikishwa katika Mahakama ya Hakimu Mkazi Kisutu, jijini Dar es Salaam, wakikabiliwa na shitaka moja la mauaji ya mwanasheria huyo mkongwe.

Saa 2:30 asubuhi washtakiwa hao wakiwa chini ya ulinzi mkali wa jeshi la polisi walifikishwa katika viunga vya mahakama hiyo kwa ajili ya kusomewa mashitaka yao.

Washtakiwa hao ni,  wafanyabiashara Chibago Magozi maarufu kama Chiligati (32), mkazi wa Vingunguti, John Mayunga ama Ngosha (56), mkazi wa Kiwalani na Juma Kangungu (29), mkazi wa Vingunguti.

Wengine ni mlinzi wa Dk. Mvungi, Longishu Losingo (29), mkazi wa Kariakoo Msimbazi, dereva Masunga Msukuma (40), mkazi wa  Kitunda,Paulo Mdonondo (30), mkazi wa Tabata Darajani na Mianda Mlewa ama White (40), mkazi wa Vingunguti Shule ya

Tapa.

Wengine ni, Zacharia Msese (33), mkazi wa Buguruni Ghana kwa Hawa Masudi, Msigwa Matonya (30), mkazi wa Vingunguti Machinjioni na Ahmad Kitabu (30), mkazi wa Kinondoni Mwananyamala.

Walisomewa mashitaka yao mbele ya Hakimu Mkazi Mhe. Sundi Fimbo. Wakili wa Serikali Aida Kisumo alidai kuwa washtakiwa hao wanakabiliwa na shitaka la mauaji ya makusudi.

Wakili Kisumo alidai kuwa Novemba 3, mwaka huu, eneo la Msakuzi Kiswegere, wilayani Kinondoni, Dar es Salaam, washtakiwa kwa pamoja na kwa makusudi  walimuua Dk. Mvungi.

Hata hivyo, Hakimu Sundi alisema kwa kuwa mahakama hiyo haina mamlaka kisheria kusikiliza kesi za mauaji, hivyo  washtakiwa hawakutakiwa kujibu chochote hadi pale upepelzi wa kesi yao utakapokamilika,  na kesi hiyo kuhamishiwa Mahakama Kuu Tanzania, Kanda ya Dar es Salaam.

Upande wa Jamhuri ulidai  kuwa upelelezi haujakamilika hivyo waliomba mahakama kupanga tarehe nyingine ya kutajwa kesi hiyo. Hakimu Sundi alisema kesi hiyo itatajwa Desemba 5, mwaka huu, aliamuru washtakiwa wapelekwe mahabusu.