hoja ya haja: Mimi wa Ughaibuni kama Diaspora pia ni Mtanzania

Swali muhimu tunaloulizwa Watanzania tunaoishi ughaibuni ni: tunataka nini hasa kwenye katiba mpya? Na ni kwa namna gani tunataka changamoto zetu ziingizwe kwenye katiba mpya? 

Katika kipindi hiki cha Bunge Maalumu la Katiba tumeonelea ni muafaka kuyapatia majibu maswali haya. Kwa kuanzia na bila kupoteza muda, Watanzania wa ughaibuni tunataka masuala yafuatayo yaingizwe kwenye katiba mpya: 

· Uraia wa nchi mbili; 

· Haki ya kurudi Tanzania kwa Watanzania na Watu wenye asili ya Kitanzania yaani “Right of Return”; 

· Haki ya kupiga kura yaani “voting rights”; 

· Kupata wawakilishi wa kuwawakilisha Watanzania wa ughaibuni serikalini na bungeni; 

· Haki ya kushiriki katika shughuli za kiuchumi na kimaendeleo za Tanzania. 

Katika kujibu swali la pili ambalo ni: ni kwa namna gani tunataka haya tunayoyataka yaingizwe bungeni? Jibu la swali hili ni rahisi sana. 

Tunawaomba Waheshimiwa wa Bunge Maalumu la Katiba pale watakapoanza kuyajadili masuala ya uraia na yale ya Watanzania waishio ughaibuni basi wakubaliane na maombi yetu yaliyotajwa hapo juu na wayapigie kura na kuyaingiza kwenye katiba. 

Mwakilishi wetu kwenye Bunge Maalumu la Katiba Mheshimiwa Kadari Singo naye anaomba msaada wa Waheshimiwa wabunge wa Bunge Maalumu la Katiba katika kuyapigia kura maoni haya na kuyaingiza kwenye katiba mpya.

Kwenye maombi yetu, karibu asilimia 95 ya Watanzania wanaoishi ughaibuni wanakubaliana nasi viongozi wao wa Jumuiya za Watanzania kwenye diaspora kuwa uraia wa nchi mbili unatoa suluhisho kwenye matatizo yao wanayokumbana nayo siku hadi siku huku ughaibuni. 

Vile vile uraia wa nchi mbili utalipatia taifa faida nyingi tu za kiuchumi, kiutamaduni, kielimu, kisayansi, kiteknolojia na katika masuala mengine mengi ambayo ni muhimu katika kuleta maendeleo ya Tanzania kwa ujumla. 

Suala la uraia wa nchi mbili na haki ya kurudi nyumbani kwa binadamu yeyote anayeishi kwenye nchi nyingine lipo vile vile kwenye “The Universal Declaration of Human Rights” kama haki ya msingi kwa kila binadamu. 

Kwenye haki za binadamu mtu yeyote ana haki ya kurudi katika nchi aliyozaliwa au katika nchi aliyo na ndugu na familia yake. Kwa mantiki hiyo “Right of Return” kama ilivyojadiliwa hapo juu ni muhimu sana kwa Watanzania wanaoishi ughaibuni na kuwakatalia haki hii, je si kukiuka misingi ya haki za binadamu? 

Watanzania tuna rekodi nzuri ya kuheshimu haki za binadamu na nadhani huu ni wakati muafaka kwa Bunge Maalumu la Katiba kuidhinisha uraia wa nchi mbili ili kutoa haki kwa Watanzania wa ughaibuni kurudi makwao watakapotaka kufanya hivyo. 

Vile vile huu ni wakati muafaka kwa Bunge Maalumu la Katiba na kwa Serikali kukubali kuwa Watanzania waishio ughaibuni wanatakiwa

kupewa haki yao ya kupiga kura. Hakuna sababu yeyote ya kimsingi ya kuwakatalia haki hii. 

Kama kukiwepo na “political will” basi itakuwa ni rahisi kwa Watanzania wa ughaibuni kuruhusiwa kupiga kura. Kupiga kura ni haki ya kila raia na watanzania wa ughaibuni wamekuwa wakinyimwa haki hii kwa muda mrefu. 

Tunaiomba serikali na Bunge Maalumu la Katiba kusikiliza kilio hiki kutoka ughaibuni na wahakikishe kuwa suala hili linaingizwa kwenye katiba mpya, ikiwa ni pamoja na kupatikana kwa wawakilishi wa Watanzania waishio ughaibuni watakaochaguliwa na Watanzania wa Ughaibuni kwa kufuata Katiba ya Tanzania na kwa kufuata sheria zitakazotungwa nchini Tanzania. 

Kwa kumalizia tunawaomba Watanzania wasaini “petition” ya kuomba uraia pacha iliyowekwa kwenye blogu mbalimbali. 

Tunaliomba Bunge Maalumu la Katiba liyaangalie maombi yetu haya na liyafanyie kazi ili yaingizwe kwenye katiba mpya ya Jamhuri ya Muungano wa Tanzania. 

Imeandaliwa na Deogratius Mhella, 

Katibu wa Vikao vya Muungano wa Jumuiya za Watanzania Marekani na DICOTA 

Katika kufikisha Maombi ya Watanzania wa Ughaibuni kwenye Vyombo vya habari ili kuelimisha umma wa Watanzania kuhusu maombi ya Watanzania waishio ughaibuni kwenye Bunge Maalumu la Katiba.