HOJA YA HAJA: kampeni ya kupambana na ukuda Tanzania

Ankal naomba nipe nafasi nitangaze nia yangu ya kuanzisha kampeni ya kupambana na UKUDA hapa Tanzania. Ruksa kunisahihisha bila kuchafua hali ya hewa; ila nielewavyo mimi UKUDA ni hali ya kuwa na roho mbaya, roho ya kwa nini, kukatishana tamaa, na pia kutopenda maendeleo ya wengine - wakati MKUDA mwenyewe akibakia kama alivyo.

Kwa mtazamo huo huo, MKUDA ni mfuasi wa hayo mambo niliyotaja hapo juu. Na ndio kampeni hii itakapoelekezwa, na nitahitaji sana msaada wa mawazo ya wadau wa namna ya kuendesha kampeni hiyo kwa faida ya nchi yetu inayoelekea kupata katiba mpya ambayo naomba UKUDA usipewe nafasi kabisa kabisa!

Ingawa ni kweli sio wote, lakini si uwongo kwamba Watanzania wengi ni WAKUDA. Mifano ni mingi sana kiasi naweza kujaza blog nzima na nisiwe nimetaja japo robo yake tu. Lakini kwa faida yenu naomba nitoe mifano michache.

UKUDA NA WAKUDA KAZINI

Huko kazini utakuta mtu anaandamwa na wakuda kwa sababu anapenda kazi yake, anawahi kazini kila siku, anapiga mzigo kama kwamba ndio siku yake ya kwanza kazini na mabosi wote wanampenda. Hapo utakuta  wafuasi wa UKUDA wanamwandama as if  kaua mtu. Wanamwita mtaka sifa, anajipendekeza, hana lolote na kadhalika. Mradi inakuwa taabu kuwa mchapa kazi hodari kwa kuwa WAKUDA hawataki uwe hivyo.

Mbaya zaidi hao WAKUDA wao ni wategaji wakubwa kazini, wachelewaji na fitina haziwaishi kuwachongea wenzao ambao hawana tabia kama zao. Pia WAKUDA ni wajuaji wa kila kitu, wabishi wa kila jambo na daima utawakuta wanapanga njama za kukatisha tamaa asiye kama wao.

UKUDA NA WAKUDA MICHEZONI

Hapa napo hakuna tofauti na kazini. Mchezaji wa timu Fulani anajituma kwa kuwahi mazoezini, kufanya mazoezi ya ziada (baada ama kabla ya mazoezi rasmi na wengine), ana nidhamu kwa viongozi, wachezaji wenzie na hata mashabiki. Huyu naye haachwi na WAKUDA.

Watampachika majina kibao ikiwa ni pamoja na mtaka sifa, anajipendekeza apangwe kila siku. WAKUDA hao wanataka awe kama wao ili timu ikishindwa iwe lawama kwa wote.

UKUDA NA WAKUDA MITAANI

Huko nako ndio usisema. Mtu anaamua kuwa msafi, anafagia kila sehemu ya nyumba yake. Na kama ni nyumba ya kupanga anahakikisha usafi na unadhifu ni vya lazima kwake. Anaheshimu kila mtu mtaani na wala hajiingizi kwenye migogoro ya ‘Kiswahili’ , na pia kwenye kila shughuli iwe ya msiba ama harusi hakosekani. Kama hawezi kuhudhuria anatoa udhuru na mapema na atahakikisha anawakilishwa na mtu wa familia yake.

Huyu mtu naye unaweza ukamuonea huruma hapo mtaani ama katika nyumba anayoishi, kwa sababu zile zile za KIKUDA.

HITIMISHO

Kama niliyodokeza, mifano ni mingi mno. Ila kwa hiyo mitatu nahisi mada yangu hii inaeleweka sasa. Kifuatacho ni kuomba mawazo ya nini kifanyike ili kampeni ianze. Nimejiandaa kuifanya kampeni hii kupitia vyombo vya habar vyote, mikutano ya hadhara na makongamano. Wafadhili kadhaa nilioongea nao wameonesha nia kubwa ya kusaidia kampeni hii ifanikiwe kwa faida ya wote.

Naomba kuwakilisha

MPINGA UKUDA NA WAKUDA