polisi mkoani katavi wakamata mtu akiwa na meno ya tembo na gobole

Kamanda wa Polisi wa Mkoa wa Katiavi Afande Dhahiri Kidavashari akionesha meno ya tembo vipande 2 yenye thamani ya shilingi 22  aliyokamatwa nayo mtuhumiwa Bathoromeo Mtongwa Machi 8, 2014 katika kijiji cha Kilida, tarafa ya Mamba wilaya ya Mlele ambapo pia mtuhumiwa huyo alikamatwa na gobole 1 na risasi 14.

Mkaazi wa kijiji cha Kilida tarafa ya mamba wilaya ya mlele Bathoromeo Mtongwa (58) akiwa katika kituo cha polisi cha mkoa wa Katavi baada ya kukamatwa na meno mawili ya tembo yenye uzito wa kilo 15 yenye thamani ya shilingi milioni 22 na gobole moja pamoja na risasi 14. 

-------------------------

Na Walter Mguluchuma, 

Mpanda, Katavi

Mtu mmoja aliyefahamika kwa jina la Bathoromeo James Mtongwa mkaazi  wa Kijiji cha Kilinda Tarafa ya Mamba Wilaya ya Mlele Mkoa wa Katavi amekamatwa akiwa na vipande viwili vya meno ya tembo vyenye uzito wa kilo 15 vyenye thamani ya shilingi milioni 22 pamoja na bunduki moja aina ya Gobore na Risasi 14

Kwa mujibu wa Kamanda wa Jeshi la Polisi wa Mkoa wa Katavi Kamishna mwandamizi msaidizi  Dhahiri Kidavashari.  mtuhumiwa huyo alikamatwa Machi 7, mwaka huu majira ya saa mbili na nusu usiku.

Alisema mtuhumiwa alikamatwa kufuatia taarifa toka kwa raia wema ambazo ambazo zililifikia jeshi la polisi pamoja na askari wa Hifadhi ya Taifa ya Katavi kuwa mtuhumiwa anamiliki nyara za Serikali kinyume cha sheria.

Alifafanua  siku hiyo ya tukio majira ya saa mbili usiku polisi wakiwa na Askari wa Hifadhi ya Taifa ya Katavi walifika kwenye kijiji hicho cha Kilinda nyumbani kwa mtuhumiwa Bathoromeo na kufanya upekuzi nyumbani kwa mtuhumiwa na kufanikiwa kukamata risasi 14.

Kamanda Kidavashari alieleza wakati askari hao wakiendelea na upekuzi kwa kushirikiana na uongozi wa kijiji walilitilia shaka eneo moja la nyumba hiyo ya mtuhumiwa kutokana na eneo hilo kuonekana kuwa limechimbwa hivi karibuni.

Alisema  askari walipoamua kuchimba eneo hilo na baada ya kufukua kwa kitambo kidogo walifanikiwa kukuta meno ya Tembo vipande hivyo vya meno ya tembo vikiwa vimefukiwa ardhini hapo.

Baada ya kukamatwa kwa maneno hayo ya Tembo polisi walianza kumhoji mshitakiwa kwa kumtaka awaelekeze sehemu ambayo amekuwa akihifadhi Silaha ambayo amekuwa akiitumia kwenye matukio ya ujangili

Kamanda Kidavashari alieleza baada ya mahojiano mtuhumiwa aliweza kueleza kuwa bunduki ambayo amekuwa akiitumia kwenye matukio ya ujangili ameificha eneo linaloitwa King’anda lililopo ndani ya Hifadhi ya Taifa ya Katavi.

Alisema mnamo Mnamo Machi 8, 2014 majira ya saa nane mchana mtuhumiwa aliwaongoza Askari Polisi na Askari wa Hifadhi ya Taifa ya Katavi hadi eneo la King’anda  na kuwaonyesha silaha hiyo  kwenye kichaka.

Mtuhumiwa anatarajiwa kufikishwa Mahakamani wakati wowote mara baada ya upelelezi wa tukio hili utakapokamilika mapema iwezekanavyo.

Pia jeshi la polisi Mkoa wa Katavi lanatowa wito kwa wananchi kuendelea kutoa ushirikiano kwa jeshi la polisi kwa kutowa taarifa za watu wanaojihusisha na uwindaji haramu wa rasilimali za Taifa ili kulinda na kuhifadhi rasilimali zetu kwa manufaa ya vizazi vijavyo.