KUTOKA MAKTABA: TASWIRA YA KIHISTORIA YA GLOBU YA JAMII...

Kutoka kushoto ni: Lwitiko Mwakilasa, Bernard Kakengi, Mapinduzi Mwankemwa, Mzee Kimaro wa JWTZ, Victor Gunze wa TBC, Raymond Mutafungwa. Rupia Lyabandi, Dennis Londo, Ankal Muhidin Issa Michuzi, Fidelis Tungaraza "Mti Mkubwa", Ndesanjo Macha, Magonera Malima na Kisakisa Kiwala.

Taswira hii ni ya Septemba 10, 2005 katika kiota cha maraha kinachopendwa sana na Wabongo cha Chelsea hapo jijini Helsinki Finland. Tukio ni mkusanyiko wa wadau kusherehekea kuanzishwa rasmi kwa Globu ya Jamii takriban miaka 10 iliyopita. Hii ilikuwa ni pembeni mwa mkutano wa Helsinki (Helsinki Conference) ambao Rais Benjamin Mkapa (wakati huo) alihutubia na Waziri wa Mambo ya Nje wa Tanzania (wakati huo) Mhe Jakaya Mrisho Kikwete na mwenzake wa Finland, Mhe Errik Tuomioja, walikuwepo, pampja na Dkt Asha-Rose Migiro (wakati huo akiwa Waziri  wa Maendeleo ya Jamii, Jinsia na Watoto) 

Ni kweli kwamba Ndesanjo Macha (aliyesimama kulia na gwanda la bluu) ndiye aliyefanikisha kuanzishwa kwa Libeneke hili pale jirani na hapo Chelsea, katika ukumbi wa Finlandia, si uwongo kwamba Fide Tugaraza (kifuani pa Ankal, na kulia kwa Ndesanjo, ndiye aliyesababisha yote haya kutokea kwa msimamo wake wa kumcharura Ankal na wanahabari wa Bongo, kwamba kwa nini hawaleti vitu vya nyumbani mtandaoni? 
Yaani kama si yeye (Fide) Globu ya Jamii isingekuwa hai hii leo. Na Kama si Ndesanjo kumpa lekcha Ankal ya nanmna ya kuanzisha blogu, tungekuwa tunaongea nini sijui saa hizi.

Kwa heshima na taadhima Globu ya Jamii inapenda kutoa saluti kwa mkusanyiko huu wa kihistoria ambao mbali na kuwa wadau wa mwanzo wa Libeneke hili, pia wadau hawa ndio waliosimama kidete kuhakikisha hakuna kinachoharibika. ASANTENI SANA SANA FIDE NA NDESANJO pamoja na wadau wote katika taswira hii ya kihistoria. Hatuna cha kuwalipa zaidi ya kusema AHSANTENI AHSANTENI SANA SANA.