UTARATIBU WA KUSHIRIKI ZOEZI LA KUFANYA USAFI SIKU YA TAREHE 9 DISEMBA, 2015 MKOA WA DODOMA

Rais wa Jamhuri ya Muungano wa Tanzania, Mhe. Dkt. John Pombe Magufuli alitoa agizo la kumtaka kila mtu kuadhimisha siku ya kumbukumbu ya Uhuru tarehe 9 Disemba, 2015 kwa kushiriki zoezi la kufanya usafi wa mazingira. 

Katika Mkoa wa Dodoma, zoezi hilo litahusisha kazi za usafi wa makazi na maeneo ya shughuli mbalimbali, kufagia barabara za lami na vumbi, kufyeka nyasi kandokando mwa barabara na katika maeneo ya wazi na jamii, kuokota  takataka  (mifuko ya Rambo) na kuzibua mitaro ya maji ya mvua kama ipo katika  eneo husika kuanzia saa 1:00 asubuhi hadi saa 7:00 mchana. 

Wakurugenzi wa Halmashauri za Wilaya na Manispaa kupitia Ofisi zao ndio waratibu wa zoezi la usafi kwenye Wilaya husika. Kwa mujibu wa Mkurugenzi wa Manispaa ya Dodoma, ameainisha maeneo ambayo taasisi mbalimbali za Mkoa wa Dodoma zitayashughulikia kufanya usafi Mjini Dodoma (Orodha imeambatishwa). 

Kutokana na uhaba wa vifaa vya kufanyia Usafi. Mkurugenzi wa Manispaa ya Dodoma anashauri taasisi mbalimbali zitakazohusika na zoezi la usafi wa mazingira, ziwe na vifaa vyake vya kufanyia usafi. 

Mkurugenzi wa Manispaa ya Dodoma anasisitiza zoezi la usafi kwa taasisi, lizingatie maeneo yaliyotajwa kwenye  jedwali lililoambatishwa na Uongozi wa Serikali Mkoa wa Dodoma unamtaka kila mwananchi na taasisi zilizopo Dodoma kushiriki kikamilifu katika usafi huu.

Imetolewa na:

OFISI YA MKUU WA MKOA

DODOMA

Disemba 8, 2015