MADEREVA BODABODA KARATU WATAKIWA KUACHA MABINTI WASOME, WATIMIZE NDOTO ZAO

Na Woinde Shizza,KARATU

MADEREVA bodaboda wametakiwa  kujali mabinti, kwa kuwaacha wasome ili watimize ndoto zao  na si kuwalaghai kwa kuwapa lifti pamoja na  chipsi kwa wanapofanya hivyo wanawaharibia ndoto zao .

Hayo yameelezwa na Mkuu wa Wilaya ya Karatu, Theresia Mahongo alipokuwa akihutubia katika mdahalo juu ya kupinga ukatili wa kijinsia katika uwanja wa Mnadani wilayani Karatu,mdahalo ulioandaliwa Shirika la World Education Initiative (WEI) Bantwana; waache wasome ambalo lipo chini ya ufadhili wa watu wa marekani USAID.

Mahongo aliwasihi madereva bodaboda kuwa mfano katika wilaya ya Karatu kwa kuwatoa watoto sehemu husika kuwapeleka shuleni kama wakienda kuwachukuwa shuleni basi wawarudishe nyumbani wakiwa kwenye mikono salama na sio kuwarubini na kuwalaghai ili mradi wawachezee na wawakatishe  masomo yao

Aidha alipongeza shirika la (WEI) kwa kuandaa mdahalo huo na kutumia nafasi hiyo kuwapongeza wananchi wanaojihusisha na shughuli za bodaboda kwa kazi ya kubeba vijana na kupeleka shuleni.

Alibainisha kuwa  wanawake wote wanatambuliwa duniani, ndio maana Tanzania Rais wa awamu ya tano Dkt. John Pombe Magufuli kwa kuliona hilo alimchagua msaidizi wake ambaye ni makamu wa Rais kuwa mwanamke.

“Mzazi anamuandaa binti yake kuwa mfanyakazi au kiongozi  ili baadae aje kusaida familia, anapokumbwa na watu wanao mlaghai, binti  zile ndoto zake zinayeyuka,binti anakuwa bado ni mtoto na anapata mtoto katika umri mdogo na anakuwa ni mzigo kwa mzazi, " Mahongo

Mahongo amewaomba wananchi wa Karatu kuchukua tahadhari ya ugonjwa wa korona, kwa kuepuka kupeana mikono. Amesema ugonjwa huu umesambaa kwa nchi takribani 84 duniani kwa sasa, ameomba wananchi kuwa makini na kuchukua tahadhari zinazotolewa na wataalamu wa idara ya afya. Amesema wilaya ya Karatu imeshajiandaa kukabiliana na ugonjwa huo lakini bado amehimiza wananchi kuchukua tahadhari kubwa juu ya ugonjwa huo.

Mtaalamu wa jenda na jinsia katika  shirika la (WEI)  ambalo liko chini ya udhamini wa watu wa marekani Grace Muro amesema wamejikita katika kufanya kazi katika shule za sekondari za kutwa mbazo zimekuwa na tatizo kubwa la watoto wa kike kukatishwa masomo yao kwa sababu ya mimba.

Alisema wao kama (WEI) wamekuja kufanya kampeni ili jamii iweze kuwa na uelewa juu ya athari za mimba za utotoni, amesema hawa watoto wa kike ni wakinamama tunaotarajia kuleta maendeleo siku za usoni, Lazima tuhamasishe jamii kuacha mila potofu zinazofanya  mtoto kike kuwa duni, tumelenga kampeni yetu kwa hawa madereva wa bodaboda ambao kidole kinalenga kwao waweze kuchangia maendeleo ya mtoto wa kike aliwaomba  madereva bodaboda  kuwaona watoto wa kike kama dada zao, na  wajikite katika shughuli za kujipatia kipato.

John Lucian Katibu wa madereva bodaboda wa zamani alisema ni  lazima watoto wa kike nao wawe na maadili lakini amesisitiza  kuongeza elimu ya madili kwa wazazi.

 Alisema ni  lazima wazazi wajenge mabweni ili wanafunzi wa kike wawe shuleni au wajenge shule za sekondari karibu na maeneo ambayo ni rafiki kwa wanafunzi kike ili wanaweza kufika kwa urahisi shuleni.

 Aidha alisema   kuna tatizo la mimba kwa watoto wa kike ambalo linamalizwa kinyumbani  jambo ambalo linafanya kesi za mimba kuendelea kuongezeka na kuwataka  wanaohusika na utetezi wa haki za kisheria za watoto wa kike kupata mimba mashuleni,  kuongeza umakini.