WAKAZI WATATU DAR WAFIKISHWA KORTINI WAKIKABILIWA NA SHTAKA LA KUSAFIRISHA DAWA ZA KULEVYA AINA YA HEROINE

Na Karama Kenyunko, Michuzi Globu Jamii
WAKAZI watatu wa jijini Dar es Salaam Jimmy Mlaki (23), mkazi wa Kinondoni Moscow, Stanley Ngowi maarufu kama Sultani (24),  mkazi wa Tabata Segera na Issa Omari (29) wa Kimara wamefikishwa Mahakama ya Hakimu Mkazi Kisutu wakikabiliwa na shtaka la kusafirisha dawa za kulevya aina ya Heroine.

 Akisoma hati ya mashtaka Wakili wa Serikali Mwandamizi Wankyo Simon amedai mbele ya Hakimu Mkazi Rashid Chaungu kuwa Januari  27 mwaka huu huko Ubungo Kibo ndani ya wilayani Ubungo jijini Dar es salaam  washtakiwa hao walikutwa wakisafirisha dawa za kulevya aina ya Heroine zenye uzito wa gramu 509.63 huku wakijua kufanya hivyo ni kosa na kinyume cha sheria.

Hata hivyo washtakiwa hawakuruhusiwa kujibu kitu chochote mahakamani hapo kwa kuwa mahakama hiyo haina mamlaka ya kusikiliza kesi za dawa za kulevya ambazo kwa kawaida husikilizwa Mahakama Kuu ama kwa kupata kibali kutoka kwa DPP.Kesi hiyo imeahirishwa hadi Machi 17, mwaka huu.

 Wakati huo huo Fundi bomba Daniel Chizuwa mkazi wa Kigamboni jijini Dar es Salaam amefikishwa mahakamani hapo kwa kosa la kukutwa na kobe wawili kwenye thamani ya USD 140 ambazo ni sawa Sh. 320, 600 za kitanzania  mali ya Serikali ya Jamuhuri ya Muungano wa Tanzania bila ya kuwa na kibali cha Mkurugenzi wa wanyamapori.

Mshtakiwa anadaiwa kutenda kosa hilo Januari 22, mwaka 2020 huko maeneo ya Cliff Side jijini Dar es Salaam.