TAKUKURU YAMFIKISHA MWALIMU MAHAKAMANI KWA UDANGANYIFU WA MTIHANI

Na Mwandishi wetu, Kiteto

TAASISI ya Kuzuia na Kupambana na Rushwa TAKUKURU, imemfikisha

Mahakamani mwalimu Mkuu wa shule ya msingi Orkitikiti, Kijiji cha

Engong'ongare Wilayani Kiteto, Oscar Waluye na kusomewa mashtaka ya

udanganyifu wa mtihani.

Kaimu Mkuu wa TAKUKURU Mkoani Manyara, Alli Sadiki Hajji akizungumza

na waandishi wa habari amesema  pia, mwalimu huyo Waluye, amefukuzwa

kazi na mamlaka yake ya nidhamu.

Hajji amesema Waluye ameshtakiwa kwa kufanya udanganyifu katika

mtihani wa darasa la saba iliyofanyika Oktoba 2020 kitendo ambacho ni

kinyume cha kifungu cha 23 na 24 (1) sheria ya baraza la mitihani la

Taifa.

Amesema kesi hiyo ya jinai imefikishwa mbele ya hakimu mfawidhi wa wa

mahakama ya wilaya ya Kiteto, Joakim Mwakyolo na mwendesha mashtaka wa polisi Wilfred John.

"Hata hivyo, mshtakiwa amekana shtaka hilo na kushindwa kutimiza masharti ya dhamana hivyo kupelekwa rumande na kesi hiyo itatajwa tena Februari 16

mwaka huu," amesema Hajji.

Amesema uchunguzi wa TAKUKURU Wilayani Kiteto umeonyesha kwamba Waluye aliwalazimisha wanafunzi wawili wa darasa la sita wa shule hiyo

kufanya mitihani ya darasa la saba badala ya watahiniwa ambao uwezo

wao darasani unaelezwa ni wa kiwango cha chini.

"Pia Waluye alimkaririsha mwanafunzi mmoja aliyehitimu shuleni hapo

mwaka 2019," amesema Hajji.

Amesema wanafunzi hao wawili wa darasa la sita na mmoja wa darasa la

saba aliyehitimu mwaka 2019 walikamatwa na makachero wa TAKUKURU

tayari wakiwa wamefanya mitihani ya masomo ya Kiswahili na Hisabati

kwa niaba ya wanafunzi wenzao wanaodaiwa kuwa na uwezo mdogo huku

aliyekaririshwa akifanya mtihani wa mwanafunzi mtoro.

Amesema katika mahojiano na maofisa wa TAKUKURU Wilayani Kiteto,

Waluye alikiri kutenda makosa hayo kwa maelezo kuwa alitaka shule hiyo

ionekane imefaulisha vizuri.

"Kitendo hicho ni kinyume cha maadili kwa kuwa kinawajengea watoto

ambao ni Taifa la kesho tabia za ukiukwaji wa maadili na wakati wote

kuwa tegemezi," amesema Hajji.

Ametoa rai kwa wazazi, walezi na walimu kuwalea watoto katika njia

iwapasao kwani hawataiacha hata watakapokuwa wazee (Biblia Mithali

22:6.)

"Nitumie nafasi hii kuwafahamisha watumishi wa umma Mkoani Manyara

kwamba kuanzia sasa watakaodhihirika kutenda makosa ya jinai na Rushwa

tutakuwa tunawafikisha kwanza kwenye mamlaka zao za nidhamu na

kuwashtaki kwa mujibu wa kanuni za utumishi wa umma na wasiendelee

kupokea mishahara bila kuifanyia kazi," amesema Hajji.

Amesema baada ya kuondolewa kwenye utumishi, mashtaka ya jinai

yatafuata kama ilivyofanyika kwa Mwalimu Waluye kwa kuwa jinai haina

ukomo.