WATANZANIA ASILIMIA 80 KUFIKIWA NA HUDUMA YA INTANETI BAADA YA MIAKA MITANO

Charles James, Michuzi TV

SERIKALI imesema imepanga kuhakikisha ndani ya miaka mitano ijayo Watanzania asilimia 80 wawe wanapata na kutumia huduma za Intaneti huku pia Mkonga wa Taifa ukiwafikia watanzania kwa asilimia hizo hizo 80.

Kauli hiyo imetolewa jijini Dodoma leo na Waziri wa Mawasiliano na Teknolojia ya Habari, Dk Faustine Ndugulile alipokua akizungumza na wajumbe wa Kamati ya Kudumu ya Bunge ya Miundombinu kwenye semina iliyoandaliwa na Mfuko wa Mawasiliano kwa Wote (UCSAF) yenye lengo la kuwapa uelewa wajumbe wa kamati hiyo kuhusu mfuko huo.

Dk Ndugulile amesema Wizara ya Mawasiliano ni mojawapo ya wizara ambayo kwa kiasi kikubwa inagusa kila wizara hivyo wako kwenye maandalizi ya kufanya mapinduzi ya kidigitali lakini pia kutengeneza matumizi wezeshi ya Tehama serikalini na kwenye sekta binafsi.

" Mfuko huu umeanzishwa mahususi kwa lengo la kupeleka mawasiliano kwa kila mtanzania, mawasiliano hayo siyo ya Simu pekee bali hata Televisheni na Radio nazo tumekua tukizipa msaada mkubwa katika kuhakikisha zinarusha vema matangazo yao.

Lengo letu ni kuhakikisha kupitia mkonga wetu wa taifa serikali siyo tu inatoa huduma ya mawasiliano kwa wananchi wake lakini pia inakusanya mapato ambayo yatasaidia pia kukuza uchumi wetu," Amesema Dk Ndugulile.

Kwa upande wake Mtendaji Mkuu wa UCSAF, Justina Mashiba amesema tayari wameshaini mikakati ya kufikisha mawasiliano kwenye kata 1,057 zenye vijiji 3,303 vyenye watanzania 12,981 huku kata 371 ambazo bado zitakamilika Oktoba mwaka huu.

Amesema Mfuko wa Mawasiliano kwa Wote tayari ushakamilisha miradi katika kata 686 zenye vijiji 2,489 ambavyo vina wakazi Milioni Nane sawa na asilimia 65 ya miradi yote.

" Siyo hivyo tu pia tuna miradi ya kuwezesha shule zetu za umma kuunganishwa na mitandao ya intaneti na tayari tumeshafanya hivyo kwa baadhi ya shule lakini pia tuna miradi ya Tiba Mtandao ambapo kwa kushirikiana na wadau wa afya tayari tumeanza ambapo sasa Mgonjwa aliyepo Hospitali ya Rufaa Morogoro anaweza kuwasiliana na Daktari aliyepo Hospitali ya Muhimbili, " Amesema Mashiba.

Mwenyekiti wa Kamati ya Kudumu ya Bunge ya Utawala Bora, Humphrey Polepole akichangia katika semina iliyoandaliwa na Mfuko wa Mawasiliano kwa Wote UCSAF kwa ajili ya Kamati ya Kudumu ya Bunge ya Miundombinu ambapo baadhi ya wenyeviti wa kamati zingine akiwepo Polepole walialikwa.

Mtendaji Mkuu wa UCSAF, Justina Mashiba akitoa mada kwenye semina ambayo Mfuko huo iliuandaa kwa ajili ya wabunge ambao ni wajumbe wa kamati ya kudumu ya bunge ya miundombinu.

 Waziri wa Mawasiliano na Teknolojia ya Habari, Dk Faustine Ndugulile akizungumza mbele ya wajumbe wa kamati ya  kudumu ya bunge ya miundombinu katika semina iliyoandaliwa na Mfuko wa Mawasiliano kwa Wote UCSAF leo jijini Dodoma.