SERIKALI YA CCM IMEJIPANGA KUENDELEZA, KUINUA SEKTA YA SANAA - SHAKA

Wasanii mbalimbali wakimsikiliza Katibu wa Itikadi na Uenezi wa Chama Cha Mapinduzi( CCM) Shaka Hamdu Shaka hayupo pichani wakati akielezea mikakati iliyowekwa na Chama hicho katika kuwainua na kuwaendeleza wasanii nchini Tanzania.

Katibu wa Itikadi na Uenezi wa CCM Shaka Hamdu Shaka akizungumza na wasanii mkoani Dar es Salaam kupitia Jukwaa la Wasanii lililoandaliwa na Kampuni ya Marketing Africa.

Na Mwandishi Wetu, Michuzi TV

CHAMA Cha Mapinduzi( CCM) kupitia Katibu wake wa Itikadi na Uenezi Shaka Hamdu Shaka kimesema kitaendelea kuweka misingi imara ya kuendeleza sanaa nchini na kuwahakikishia wasanii wanathamini na kuendelezwa.

Akizungumza kupitia Jukwaa  la Wasanii liloandaliwa na Kampuni ya Marketing Africa mkoani Dar es Salaam,Shaka amsema Serikali inadhamira njema ya kukuza na kuwathamini wasanii huku akifafanua  Rais  Samia Suluhu Hassan ameanzisha Wizara maalum ya Sanaa na utamaduni.

"Lengo likiwa  ni  kushughulikia changamoto za wasanii zilizopigiwa kelele kwa muda mrefu.Kupitia hotuba ya Rais  Samia katika Baraza kuu la umoja wa mataifa, ameeleza suala la sanaa kwa  sasa litachukua mkondo mpya katika uwanja mpana wa kimataifa,"amesema.

Shaka amesema sasa wasanii wa Tanzania watashirikiana na wasanii wengine wa duniani katika uwekezaji mkubwa katika sanaa kupitia sera  ya diplomasia ya uchumi.

"Tuitumie sanaa kama  silaha ya ukombozi wa matatizo ya kijamii na kamwe isiwe chanzo cha mfarakano na vurugu kwani Tanzania ni nchi Tajiri, yenye rasilimali za kila aina, na rasilimali namba moja ni vipaji tulivyonavyo  hivyo Wasanii wakiamua wataweza , kila mmoja wetu ana jukumu la kufanya sanaa yake kwa bidii na maarifa,"amesema na kuongeza.

"Huu ni wakati wa Suluhu, hivyo wasanii wawe wazi kuacha kufanya sanaa kwa mazoea,katika   zama tulizonazo, kazi ya sanaa imegeuka kuwa kimbilio kubwa kwa vijana kama sehemu ya soko la ajira hivyo ni wajibu  wetu wasanii kuhakikisha kuwa imani ya Jamii kwetu inaendelea kwa kulinda mila, desturi na utamaduni wetu,"amesema.

Jukwaa ili limeandaliwa kwa lengo la kutoa elimu ya masoko, uzalishaji bora wa kazi sanaa sambamba na kutoa ushauri wa kibiashara.