JOSIAH WAPANDA MITI YA PALM KILELE CHA SIKU YA WANAWAKE.

Na Abdulatif Yunus - Michuzi TV Kagera

Uongozi wa Shule na Wanafunzi wa Josiah Sekondari iliyopo Bukoba Manispaa kwa Kushirikiana na Wadau mbalimbali ikiwemo Benki ya CRDB wameungana na Wanawake wengine Ulimwenguni kuadhimisha Siku ya Kimataifa ya Wanawake kwa kupanda miti aina ya Palm Katika Viwanja vya Shule hiyo.

Tukio hilo lililoratibiwa na Shule hiyo ya Wasichana, limehusisha pia upandaji wa Miti mingine ya matunda ikiwemo Parachichi iliyopandwa eneo hilo la Shule lengo likiwa ni kuweka mazingira yao safi, kupamba shule yao sambamba na kuunga mkono Kampeni ya Upandaji Miti aina ya Palm inayoendelea ndani ya Manispaa ya Bukoba Iikisubiriwa kuzinduliwa rasmi.

Awali kabla ya Upandaji miti Wadau mbalimbali wakiwemo Bukoba Tours, Shekhaina Pharmacy, Benki ya CRDB na wengine, wamepata fursa ya kuzungumza na Wasichana hao, baada ya Majadaliano yaliyofanywa na Wanafunzi wenyewe wakati wakiwasilisha mada mbalimbali zenye kuwajenga na kuwakumbusha thamani yao kama watoto wa Kike.