WANANCHI GAIRO WAMUUNGA MKONO RAIS SAMIA KWA KUPANDA MITI

Na Mwandishi Wetu, Michuzi TV

MHIFADHI  Misitu Wilaya ya Gairo mkoani  Morogoro Robert Mwangosi ameelezea jinsi wilaya hiyo ilivyojipanga kipindi hiki kwa ajili ya kupanda miti itakayowesesha kuweka hali nzuri ya Mazingira pamoja kusaidia kupatikana kwa hewa safi inayotegemewa na kila mmoja wetu.

Akizungumza wakati wa tukio la upandaji miti katika Wilaya hiyo,Mwangosi amesema wao kama wakazi wa wilaya ya Gairo kutoka TFS kwa kushirikiana na ofisi ya Mkuu wa wilaya ya Gairo wamejipanga vyema na  wamekuja na kauli mbiu na mikakati madhubuti katika kukabiliana na hali ya jangwa na mikakati ya Gairo yenye urithi wa kijani.

"Tumefanya mipango mbalimbali ya kujidhatiti ya upandaji miti ikiwa ni kuanzisha clubs, kuweka mbinu mbalimbali, kuwaunganisha wanafunzi kwa pamoja kuweza kupanda miti na kuweka miundo mbinu ya kufanya wanafunzi waweze kupenda mazingira na tumefanikisha kila mwanafunzi ana mti mmoja anaoweza kuusimamia toka ameingia shule hadi atakapo maliza," amesema  Mwangosi

Kwa upande wake Mkuu wa Wilaya ya Gairo Jabiri Makame amesema kampeni ya urithi wa kijani Gairo, ni kampeni  inayolenga kuibadilisha wilaya hiyo na kuwa ya kijani kwa kufanya harakati za upandaji wa miti na kuweza kutoa elimu kwa jamii juu ya suala zima la uhifadhi wa mazingira ili wilaya hiyo itoe mchango mkubwa katika kumuunga mkono Rais wa Tanzania  Samia Suluhu Hassan katika harakati ya kukabiliana na mabadiliko ya tabia ya Nchi.

Mmoja ya wafanyakazi wa TFS akichukua mche wa mti kwa ajili ya kwenda kuipanda katika Wilaya ya Gairo mkoani Morogoro

Wananchi wa Wilaya ya Gairo mkoani Morogoro wakielekea kwenye moja ya maeneo kwa ajili ya kupanda miti ikiwa ni sehemu ya Wilaya hiyo kutunza mazingira kwa kupanda miti

Baadhi ya Wananchi wa Wilaya ya Gairo mkoani Morogoro wakishiriki tukio la upandaji miti  ikiwa ni mkakati wa Wilaya hiyo kuendelea kutunza Mazingira pamoja na uhifadhi.Miti hiyo inepandwa kutokana na ishi kati ya Wakala wa Huduma za Misitu Tanzania ( TFS) na Ofisi ya Mkuu wa Wilaya Gairo.