TAARIFA KWA UMMA TARATIBU ZA KUPATA KIBALI CHA URATIBU MAONESHO, MAKONGAMANO NA MISAFARA YA KIBIASHARA

    

Mamlaka ya Maendeleo ya Biashara Tanzania (TanTrade) inapenda kutoa taarifa juu ya

taratibu za kupata vibali vya uratibu wa Maonesho (Trade Fairs and Exhibitions),

Makongamano, Misafara ya Kibiashara (Trade Missions) pamoja na shughuli nyingine za

Ukuzaji Biashara (Trade Promotional Events) ndani na nje ya Nchi.

Kifungu cha 5(1) (b) cha Sheria ya Mamlaka ya Maendeleo ya Biashara Tanzania

(TanTrade), Na. 4 ya mwaka 2009 pamoja na marekebisho yake, kimeipa TanTrade

mamlaka ya kuunganisha na kudhibiti Soko la Ndani (Integrate and Regulate Domestic

Market). Uratibu wa shughuli za Ukuzaji Biashara ni sehemu ya utekelezaji wa matakwa

hayo. Kadhalika, Kifungu cha 5(1), (p) cha Sheria hiyo pamoja na Aya ya 3(1)(k) ya Kanuni

za Sheria ya TanTrade za mwaka 2010, vinaipa TanTrade mamlaka ya kumruhusu/ kutoa

kibali kwa mtu yeyote, Taasisi au Shirika lolote kuandaa Maonesho ya ndani (local) na ya

Kimataifa (International).

TanTrade imepokea malalamiko ya baadhi ya washiriki wa Misafara ya Kibiashara ambayo

imefanyika bila waandaaji wa misafara hiyo kupata Kibali cha TanTrade. Baadhi ya

Waandaaji wa misafara hiyo, hawatimizi ahadi na mahitaji kwa wateja/washiriki kama

yalivyoainishwa kwenye matangazo ya misafara hiyo na kulingana na gharama zilizolipwa

na washiriki. Kadhalika, baadhi ya waandaaji wa shughuli za ukuzaji biashara kama

Maonesho na misafara ya Kibiashara wamekuwa wakitumia picha za baadhi ya Viongozi

wa Serikali katika matangazo ya shughuli hizo bila ya kibali ama ridhaa ya Viongozi husika.

Waandaaji hao wamekuwa wakiupotosha Umma kupitia mitandao ya kijamii kama vile

Instagram, Whatsapp na facebook kwamba TanTrade inawaonea na kuwanyima vibali vya

kuandaa shughuli za ukuzaji Biashara, jambo ambalo sio la kweli. TanTrade inapenda

kusisitiza kuwa itaendelea kutoa vibali kwa watu binafsi, Kampuni, Taasisi na Asasi

ambazo zimekidhi vigezo vya kuratibu shughuli za ukuzaji wa biashara bila kumwonea mtu

yeyote. Tunatoa wito kwa waandaaji wote wa shughuli za Ukuzaji Biashara kufuata Sheria

na Taratibu zilizopo ili kuondoa usumbufu na utapeli katika Sekta hii kwa maslahi ya Taifa

letu.

Kadhalika, tunatoa angalizo kwa Umma kuwa, ili kuepuka usumbufu usio wa lazima kabla

ya kushiriki shughuli yoyote ya ukuzaji Biashara iliyoandaliwa na Kampuni au Taasisi

yoyote, ni vema kupata uthibitisho ikiwa mwandaaji amepata idhini ya TanTrade ya

kuandaa shughuli husika.

Kwa maelezo zaidi tafadhali wasiliana nasi kupitia namba 0733 002 014 au tembelea tovuti

yetu www.tantrade.go.tz au fika katika Ofisi zetu zilizopo katika Uwanja wa Maonesho wa

Mwl. Nyerere, Barabara ya Kilwa, Dar es Salaam au Jengo la Kilimo V, Barabara ya VETA

nyuma ya CBE, Dodoma na Zanzibar, Kijangwani, Jengo la Posta.

Imetolewa na:

Daniel J. Diah

Afisa Uhusiano na Mawasiliano kwa Umma