MMAHA YATOA MSAADA WA TAULO ZA KIKE NA SABUNI KWA WANAFUNZI HANDENI

Na Raisa Said, Handeni

Marafiki wa Maendeleo Handeni (MMAHA) wametoa msaada wa taulo za kike na sabuni kwa wanafunzi zaidi ya elfu 1200 walipo katika shule nane zilizopo wilayani Handeni mkoani Tanga.

Msaada huo wenye thamani ya sh. Million tano (5) ulikabidhiwa na Mwenyekiti wa Taasisi hiyo Mariam Mwanilwa wakati alipowatembelea wanafunzi waliopo madarasa maalumu ya kurekebisha mada ngumu katika shule nane za wilaya hiyo.

Mwanilwa pia alitumia fursa hiyo kuongea na wanafunzi hao ambao wanajiandaa kufanya mitihani yao ya kumaliza kidato cha nne na cha pili ambapo aliwahimiza kusoma kwa bidii ili wapate matokeo mazuri pindi watakapo fanya mitihani yao ya kitaifa pamoja na kukumbuka majukumu yao muhimu katika jamii.

Pia mwenyekiti huyo wa MMAHA aliwataka kukumbuka na kuzingatia matarajio yao na matarajio ambayo wazazi wao na taifa wanayo ju yao ikiwa ni pamoja na kuachana na tabia ambazo zinaweza kufupisha ndoto zao na matarajio yao.

Shule hizo zilizotembelewa ni pamoja na Misima, Kwenjugo, Handeni, Kivessa, na Komnyang'anyo katika Halmashauri ya Mji, Handeni, na Kiva, Mkata, na Segera katika Halmashauri ya Wilaya ya Handeni.

Mwanilwa alisema kuwa ziara ya MMAHA ni ushuhuda wa kujitolea kwa jamii kuhakikisha kuwa vijana wa wilaya hiyo wanaoata mafanikio ya kielimu na ustawi. Alisisitiza umuhimu wa kujitambua, nidhamu, na hisia kali za uwajibikaji wakati wanafunzi wanapokaribia mitihani yao.

Mwanilwa pia aliwaonya wanafunzi juu ya hatari ya tabia mbaya ambazo zinaenea na ambazo huenda kinyume na kanuni na tamaduni za kitanzania. "Lazima uwe macho dhidi ya tabia za uharibifu kama ndoa za jinsia moja, mimba na ndoa za utotoni vitu ambavyo vinadhoofisha maadili ya jamii yetu," alionya.

Akiongea kwa niaba ya wakuu wa shule nane za sekondari zilizopata msaada huo, Mkuu wa Shule ya Sekondari ya Komnyang'anyo, Martin Lawrence Mwingo, alisifu mpango huo wa Marafiki wa Maendelo ya Handeni. Alibainisha kuwa msaada uliotolewa sio tu unashughulikia mahitaji kwa vitendo lakini pia hutumika kama msukumo kwa wanafunzi kuwa makini na kuendelea kujitahidi ili kuwa bora.

"Ni ukumbusho kwamba jamii inasimama nyuma yao, tayari kusaidia safari yao ya kufanikiwa," alisema.

Rehema Athumani Kijoto, mwanafunzi wa Kidato cha nne katika Shule ya Sekondari ya Komnyang'anyo, alielezea shukrani zake kwa msaada huo, akisema kuwa utasaidia kupunguza utoro miongoni mwa wasichana ambao wanakosa madarasa wakati wa vipindi vyao vya hedhi kila mwezi kutokana na ukosefu wa taulo za kike.

Hamis Salehe Mpandile, mwanafunzi mwingine kutoka shule hiyo hiyo, alieleza changamoto ambazo wanafunzi wengi wanakabiliana nazo kutokana na wazazi wao kushindwa kukidhi mahitaji yao ya msingi, haswa wakati huu muhimu wa kujiandaa kwa ajili ya mitihani. "Msaada huu utasaidia kuinua kiwango cha ufaulu," aliwahakikishia viongozi wa Mmaha.

Mwenyekiti  wa MMAHA  Mariam Mwanilwa