YOUNG AND ALIVE INITIATIVE NA COMMUNITY CONSORTIUM UGANDA WAZINDUA MRADI WA ORASS

NA MWANDISHI WETU

Young and Alive Initiative kwa kushirikiana na Community Consortium Uganda wamezindua rasmi mradi wa miaka mitatu wa Obstacle Race Against Stigma and Shame (ORASS) wenye lengo la kupunguza unyanyapaa na kukuza ustawi wa vijana nchini.

Mradi huo unawalenga vijana wenye umri wa miaka 15 hadi 24 katika shule mbili za msingi na sekondari tatu zilizopo mikoa ya Tabora, Mbeya na Dar es Salaam.

KUJENGA UELEWA WA JAMII

Akizungumza wakati wa uzinduzi, Mkurugenzi wa Young and Alive Initiative, Secilia Shirima, alisema mradi huo utaanza kutekelezwa kwa miezi 15 ya awali kwa lengo la kujenga uelewa miongoni mwa wanafunzi, wazazi na jamii kuhusu changamoto za afya ya akili.

“Wanafunzi wengi huonekana wako salama, lakini changamoto za kiakili haziwezi kutambuliwa bila msaada wa kitaalamu. Wazazi na walimu watajengewa uwezo wa kutambua dalili, kusaidia matibabu na kutoa ushauri nasaha,” alisema Shirima.

UBUNIFU WA MRADI

Kwa upande wake, Mkurugenzi wa Mradi kutoka Community Consortium Uganda, Alice Male, alisema ORASS ni ubunifu unaochanganya michezo, mafunzo ya vitendo na elimu ya afya ya akili kwa lengo la kupunguza kwa asilimia 70 unyanyapaa unaohusiana na matatizo ya kiakili miongoni mwa vijana.

SERIKALI YAPONGEZA

Akizungumza kwa niaba ya serikali, Mkurugenzi Msaidizi kutoka Ofisi ya Rais–TAMISEMI anayeshughulikia Elimu kwa Wenye Mahitaji Maalum, Ernest Hinju, alisema serikali inaunga mkono mradi huo kwa kuwa utasaidia kupunguza unyanyapaa na kuongeza uelewa kuhusu matatizo ya afya ya akili.

“Serikali inaamini kupitia mradi huu jamii itakuwa na mwamko wa kutambua changamoto za kiakili, kupata matibabu stahiki na kuachana na imani potofu zinazochangia kunyanyapaa wagonjwa,” alisema Hinju.