SUMBAWANGA,TUNDUMA MJI ZAIMARISHA USHIRIKIANO WA KUINUA HUDUMA KWA WANANCHI.

KUTOKA RUKWA.

HALMASHAURI ya Manispaa ya Sumbawanga na Halmashauri ya Mji Tunduma zimeendelea kuimarisha ushirikiano wa kiutendaji kupitia ziara ya mafunzo iliyolenga kubadilishana uzoefu wa utoaji huduma kwa wananchi, usimamizi wa miradi ya maendeleo na uhifadhi wa mazingira kwa manufaa ya wananchi na maendeleo ya Taifa kwa ujumla.

Timu ya Uongozi na Wataalamu kutoka Halmashauri ya Mji Tunduma imefanya ziara hiyo katika Manispaa ya Sumbawanga Mkoani Rukwa ikiongozwa na Mkuu wa Wilaya ya Momba Elias Mwandobo akiambatana na Mwenyekiti wa Halmashauri ya Mji Tunduma Salum Kiyambi, Mkurugenzi wa Halmashauri Mariam Chaurembo, Waheshimiwa Madiwani pamoja na wataalamu kutoka sekta mbalimbali.

Akizungumza wakati wa ziara hiyo Mwandobo amesema kubadilishana uzoefu kati ya Halmashauri ni njia muhimu ya kuongeza ufanisi wa utendaji kazi na kuharakisha maendeleo ya wananchi kwa kujifunza mifano ya mafanikio inayotekelezwa katika maeneo mbalimbali Nchini.

Katika ziara hiyo wajumbe wametembelea miradi mbalimbali ya kimkakati inayotekelezwa katika Manispaa ya Sumbawanga ikiwemo Mradi wa Soko la Kimataifa la Mazao Kanondo, Chuo cha Ufundi Stadi (VETA) Rukwa pamoja na Uwanja Mpya wa Ndege wa Sumbawanga ambao rasmi ulianza kutumika Juni 10, 2026 kwa safari za ndege kuelekea Tabora na Dar Es Salaam.