ZIARA YA RAIS DK. SAMIA URUSI;HISTORIA INAYOBEBA MATUMAINI KWA WATANZANIA

-Pia imetuma ujumbe mzito kwa Bara la Afrika na dunia kwa ujumla

Na Said Mwishehe,Michuzi TV

ZIARA ya Rais wa Jamhuri ya Muungano wa Tanzania, Dkt. Samia Suluhu Hassan, nchini Urusi imeibua mjadala mkubwa ndani na nje ya mipaka ya Tanzania.

Wakati dunia ikiendelea kushuhudia mabadiliko makubwa ya kisiasa, kiuchumi na kidiplomasia, hatua ya Tanzania kuimarisha mahusiano yake na Urusi imeonekana kama ishara ya kujiamini, uhuru wa maamuzi na dira mpya ya diplomasia ya maendeleo.

Ziara hiyo, ambayo ni miongoni mwa ziara muhimu zaidi za ngazi ya juu kati ya Tanzania na Urusi katika miongo ya hivi karibuni, inajumuisha mazungumzo kati ya Rais Samia na Rais Vladimir Putin, ushiriki katika majukwaa ya biashara na uwekezaji pamoja na majadiliano yanayolenga kuimarisha ushirikiano katika elimu, sayansi, teknolojia, TEHAMA na sekta nyingine za kimkakati.

Diplomasia Isiyo na mipaka kwa mtazamo wa kidiplomasia, ziara hii inaakisi sera ya Tanzania ya kushirikiana na mataifa mbalimbali duniani bila kujifungamanisha na kambi moja ya kisiasa au kiuchumi.

Katika kipindi ambacho ushindani wa ushawishi kati ya mataifa makubwa duniani unaongezeka, Tanzania inaonyesha wazi kuwa iko tayari kufanya kazi na Mashariki, Magharibi na mataifa ya Kusini mwa Dunia kwa wakati mmoja, mradi ushirikiano huo unaleta manufaa kwa wananchi wake.

Hii ni ishara ya taifa linalojiamini katika maamuzi yake na linalotanguliza maslahi ya taifa kuliko siasa za makundi ya kimataifa. Kwa Afrika, hatua hii inaendana na mwelekeo wa nchi nyingi zinazotafuta washirika wengi wa maendeleo badala ya kutegemea upande mmoja.

 UCHUMI:JE,HAPA NDIPO FAIDA KUBWA ILIPO?

Kwa wengi, eneo la uchumi ndilo lenye matarajio makubwa zaidi kutokana na ziara hii.Ukweli ni kwamba lengo kuu ni kuongeza kiwango cha biashara na uwekezaji kati ya Tanzania na Urusi, huku matarajio yakielekezwa katika sekta za madini, nishati, elimu, teknolojia na miundombinu.

Iwapo makubaliano yatakayofikiwa yatawekwa katika vitendo, Tanzania inaweza kushuhudia ongezeko la uwekezaji wa moja kwa moja kutoka Urusi, upatikanaji wa teknolojia mpya, fursa za elimu kwa vijana na masoko mapya ya bidhaa za Tanzania.

Aidha, sekta ya utalii inaweza kunufaika kwa kuvutia wageni zaidi kutoka Urusi, jambo litakaloongeza mapato ya fedha za kigeni na kuchochea ukuaji wa biashara zinazotegemea utalii.

Hata hivyo, historia inaonyesha kuwa thamani ya makubaliano ya kimataifa hupimwa kwa utekelezaji wake, si kwa idadi ya nyaraka zinazotiwa saini. Mafanikio ya ziara hiyo yatategemea zaidi jinsi makubaliano hayo yatakavyotekelezwa katika miaka ijayo.

SIASA ZA KIMATAIFA NA SAUTI YA TANZANIA

Kisiasa, ziara hii inatuma ujumbe kwamba Tanzania inaendelea kujenga nafasi yake kama taifa lenye sauti huru katika medani ya kimataifa.

Kwa upande mmoja, hatua hiyo inaweza kuonekana kama juhudi za kuimarisha nafasi ya Tanzania ndani ya kundi la mataifa ya Global South na kupanua ushawishi wake katika masuala ya dunia.

Kwa upande mwingine, baadhi ya wachambuzi wa kimataifa wanaweza kuitafsiri kama ishara ya Tanzania kuimarisha zaidi mahusiano yake na Urusi katika kipindi ambacho Moscow inaendelea kuwa katika mvutano wa kisiasa na baadhi ya mataifa ya Magharibi.

Hata hivyo, sera ya Tanzania imekuwa wazi kwa miaka mingi: kujenga urafiki na kila taifa linaloheshimu maslahi ya Tanzania na kuchangia maendeleo yake.

Ushirikiano wa Kiusalama Wenye Fursa Mpya

Ingawa ajenda kuu ya ziara imejikita katika uchumi na biashara, ushirikiano wa kiusalama unaweza kuwa miongoni mwa maeneo yatakayonufaika kwa muda mrefu.

Maeneo yanayoweza kuimarishwa ni pamoja na mafunzo ya kijeshi, usalama wa mtandao, mapambano dhidi ya ugaidi, uhalifu wa kimataifa pamoja na kubadilishana uzoefu katika usimamizi wa mipaka na mifumo ya kiintelijensia.

Katika dunia inayokabiliwa na changamoto mpya za kiusalama, ushirikiano wa aina hii unaweza kusaidia Tanzania kuongeza uwezo wake wa kukabiliana na vitisho vinavyoibuka.

 ZIARA HII INATOA PICHA GANI KWA TANZANIA,AFRIKA NA DUNIA?

Kwa Tanzania, ziara hii inaonyesha taifa lenye utulivu wa kisiasa, sera huru ya mambo ya nje na uwezo wa kuvutia washirika wa kimataifa

Kwa Afrika, inatuma ujumbe kwamba bara hili halipaswi kutazamwa kama eneo la ushawishi wa upande mmoja, bali kama mshirika anayechagua mahusiano yake kwa kuzingatia maslahi ya maendeleo.

Kwa dunia, ziara hii ni ishara kwamba mfumo wa kimataifa unaendelea kubadilika kuelekea dunia yenye nguvu nyingi (multipolar world), ambapo mataifa ya kati kama Tanzania yanapata nafasi kubwa zaidi ya kujadiliana na kushirikiana na washirika mbalimbali kwa wakati mmoja.

 MANUFAA HALISI KWA TANZANIA NI YAPI?

Iwapo makubaliano yatatekelezwa kikamilifu, Tanzania inaweza kunufaika kupitia: Kuongezeka kwa uwekezaji na ajira. Kupanuka kwa biashara kati ya Tanzania na Urusi.

Fursa za elimu, utafiti na mafunzo kwa vijana. Uhamishaji wa teknolojia na maarifa ya kisasa. Kuongezeka kwa watalii na mapato ya fedha za kigeni. Kuimarika kwa nafasi ya Tanzania katika diplomasia ya kimataifa. Kupanuka kwa vyanzo vya ushirikiano wa maendeleo.

 Kwa mtazamo na tathmini yangu kwa jumla ni kwamba ziara ya Rais Samia Suluhu Hassan nchini Urusi ni zaidi ya ziara ya kawaida ya kidiplomasia. Ni hatua inayoweza kufungua milango mipya ya uchumi, uwekezaji, elimu, teknolojia na ushawishi wa Tanzania katika jukwaa la kimataifa.

Hata hivyo, mafanikio ya kweli hayatapimwa kwa picha za viongozi wakipeana mikono au makubaliano yanayosainiwa mbele ya kamera. Kipimo halisi kitakuwa ni kuona ndani ya miaka michache ijayo kama ziara hii itazalisha ajira, uwekezaji, biashara, teknolojia na maendeleo yanayogusa maisha ya Watanzania wa kawaida.

Ndipo historia itaamua kama safari ya Samia kwenda Moscow ilikuwa ziara ya kawaida au mwanzo wa ukurasa mpya wa maendeleo ya Tanzania.

ALICHOKISEMA RAIS SAMIA NCHINI URUSI 

Wakati mtazamo wako nikiweka katika maelezo  hayo ,Rais Dk.Samia Suluhu Hassan kwa upande akiwa katika ziara hiyo anasema katika siku ya kwanza ya ziara yake ya kitaifa katika Shirikisho la Urusi pamoja na mambo mengine, amepata heshima ya kukutana na kufanya mazungumzo na Mheshimiwa Rais Vladimir Putin jijini Moscow.

Kwa mujibu wa Rais Samia amesema akizungumza katika mkutano wa waandishi wq habari baada ya kuzungumza na mwenyeji wake amesema ziara yake katika Shirikisho la Urusi ina umuhimu mkubwa wa kihistoria kwake binafsi na kwa taifa la Tanzania kwa ujumla.

Amesema imepita zaidi ya nusu karne tangu kufanyika kwa ziara ya mwisho ya kiserikali ya Tanzania nchini Urusi. Hivyo, kwake hiyo ni safari ya kihistoria sana kufika Urusi kujadili masuala mbalimbali ya ushirikiano wa pande mbili pamoja na maendeleo endelevu kwa wananchi wetu. 

Akasisitiza kwa niaba yake na wananchi wa Jamhuri ya Muungano wa Tanzania, ametoa shukrani za dhati kwa mwaliko huo.

Aidha amekumbusha mchango mkubwa wa Urusi katika harakati za Tanzania za kupigania uhuru na kumpongeza Rais Putin kwa maadhimisho ya miaka 81 ya ushindi katika Vita Kuu ya Pili ya Dunia yaliyofanyika Mei 9 mwaka huu.

Pamoja na hayo amesisitiza ziara hiyo inalenga kufungua fursa zaidi kwa wananchi na kuharakisha maendeleo ya kijamii na kiuchumi, wamejadili namna ya kuimarisha ushirikiano katika sekta mbalimbali za kimkakati, zikiwemo sayansi na teknolojia, elimu, nishati, madini, kilimo, miundombinu na utalii.

KAULI YA RAIS PUTIN MBELE YA RAIS SAMIA

Rais wa Urusi, Vladimir Putin, amesema taifa lake limekuwa likifuatilia kwa karibu mageuzi mbalimbali yanayofanyika nchini Tanzania na kuridhishwa na kasi ya maendeleo yake.

Amesema mazungumzo yake na Rais Samia yamekuwa yenye manufaa makubwa kwa mataifa yote mawili na kuahidi kuendelea kuimarisha ushirikiano kati ya Urusi na Tanzania katika sekta mbalimbali za maendeleo.

Simu 0713833822