RAIS SAMIA: MARIDHIANO YA KISIASA NI UKOMAVU UNAOJENGA UMOJA NA AMANI

Na Janeth Raphael MichuziTv 

Rais wa Jamhuri ya Muungano wa Tanzania, Mhe. Samia Suluhu Hassan, amesema maridhiano ya kisiasa hayapaswi kutafsiriwa kama udhaifu, bali ni ishara ya ukomavu wa kisiasa unaoweka msingi imara wa umoja, amani na kuheshimiana katika jamii.

Akihutubia katika hafla ya utiaji saini wa Tamko la Pamoja la Maridhiano ya Kisiasa Zanzibar iliyofanyika visiwani Zanzibar leo, Alhamisi Julai 9, 2026, Rais Samia alisema viongozi wanaweza kuwa na mitazamo tofauti, lakini wakaunganishwa na dhamira ya kulinda maslahi ya taifa na ustawi wa wananchi.

Ameeleza kuwa maridhiano yanaonyesha uwezo wa viongozi kujadili hoja zinazowatofautisha kwa hekima, huku wakikubaliana katika masuala ya msingi yanayohusu uongozi na maendeleo ya nchi.

Rais Samia alisema hatua hiyo inafungua ukurasa mpya wa kuimarisha umoja, mshikamano, utulivu na amani kwa wananchi wa Zanzibar na Tanzania kwa ujumla, akisisitiza kuwa jitihada hizo zinapaswa kuendelezwa na kuenziwa.

“Hakika jitihada hizi zinahitaji kuendelezwa na kuenziwa. Nimesema jambo hili la kiungwana kwa kuwa uungwana unatufunza siasa za kushindana kwa hekima na si kwa kupaza sauti bila mantiki,” amesema Rais Samia.

Aidha, ametoa wito kwa viongozi na wadau wa siasa kuendelea kujenga utamaduni wa mazungumzo, kuheshimiana na kuweka mbele maslahi ya taifa ili kudumisha amani na kuharakisha maendeleo ya wananchi.

Rais wa Jamhuri ya Muungano wa Tanzania, Mheshimiwa Dkt. Samia Suluhu Hassan akizungumza na viongozi pamoja na wageni mbalimbali waliohudhuria hafla ya uwasilishaji wa Tamko la Pamoja la Muafaka wa Kisiasa baina ya Chama cha Mapinduzi (CCM) na ACT-Wazalendo, katika viwanja vya Ikulu Zanzibar tarehe 09 Julai, 2026.