TRAMEPRO YATOA WITO WA KULINDA UADILIFU WA TAARIFA KWA AJILI YA UMOJA, AMANI NA MAENDELEO

Dar es Salaam, Septemba 28, 2026 — Shirika la Dawa Asilia na Ulinzi wa Mazingira Tanzania (TRAMEPRO) limetoa wito kwa wananchi, viongozi, waandishi wa habari na watumiaji wa mitandao ya kijamii kuhakikisha wanahakiki taarifa kabla ya kuzisambaza, likisisitiza kuwa taarifa sahihi ni msingi wa kujenga umoja, amani na maendeleo ya Taifa.

Wito huo umetolewa leo, Septemba 28, 2026, wakati dunia ikiadhimisha Siku ya Kimataifa ya Upatikanaji wa Taarifa (International Day for Universal Access to Information).

TRAMEPRO imesema maadhimisho hayo yanapaswa kuwa fursa ya kutafakari umuhimu wa wananchi kupata taarifa sahihi, za kuaminika, kwa wakati na zinazoweza kufikiwa, sambamba na wajibu wa kila mmoja kuzihakiki na kuzitumia kwa uadilifu.

TRAMEPRO imesema maendeleo ya teknolojia za kidijitali, mitandao ya kijamii na zana za akili bandia yameongeza kasi ya uzalishaji na usambazaji wa taarifa, hivyo kuna umuhimu wa kujenga utamaduni wa kuhakiki taarifa kabla ya kuzisambaza.

Kwa mujibu wa shirika hilo, taarifa sahihi zina nafasi muhimu katika kujenga uelewa, kuimarisha uwajibikaji, kulinda afya ya jamii, kuhifadhi mazingira na kuimarisha umoja, amani na mshikamano wa Taifa.

Kaulimbiu ya maadhimisho ya mwaka huu inalenga “Kulinda Uadilifu wa Taarifa katika Enzi ya Kidijitali: Nafasi ya Upatikanaji wa Taarifa katika Kukabiliana na Mkanganyiko wa Taarifa.”

Wito kwa Waandishi wa Habari

TRAMEPRO imewasihi waandishi wa habari kuendelea kuzingatia weledi, maadili na ukweli katika utekelezaji wa majukumu yao, huku wakifanya uhakiki wa taarifa kabla ya kuzichapisha.

Shirika hilo limesema vyombo vya habari vina nafasi muhimu katika kujenga uelewa wa jamii na kutoa taarifa zinazoweza kusaidia kuimarisha umoja, amani na mshikamano.

Aidha, limewataka viongozi na taasisi za umma kutoa taarifa kwa wananchi kwa uwazi, usahihi, kwa wakati na kwa lugha inayoeleweka.

Shirika hilo pia limeonya kuhusu taarifa zisizo sahihi zinazohusu afya, dawa na tiba, likisisitiza kuwa taarifa hizo zinaweza kuwa na madhara kwa afya na maisha ya wananchi.

Changamoto nyingine zilizotajwa ni pamoja na upatikanaji usio sawa wa teknolojia, gharama za intaneti, ujuzi mdogo wa kidijitali na changamoto ya kutambua maudhui yaliyotengenezwa au kubadilishwa kwa kutumia teknolojia za akili bandia.

TRAMEPRO imewataka wananchi na watumiaji wa mitandao ya kijamii kuwa na utamaduni wa kuhakiki taarifa kabla ya kuzisambaza, ili kuzuia taarifa zisizo sahihi kuwa chanzo cha hofu, migawanyiko au madhara kwa jamii.

Shirika hilo pia limewataka wataalamu wa tiba asili kuzingatia usalama, ushahidi, maadili na uwajibikaji wanapotoa taarifa kuhusu dawa na tiba asili, na kuepuka madai ya kitabibu ambayo hayawezi kuthibitishwa.

TRAMEPRO imesema Tanzania yenye umoja na amani inahitaji utamaduni wa mawasiliano unaoheshimu ukweli na utu wa kila mwananchi.

“Taarifa sahihi hujenga uaminifu. Uaminifu hujenga uelewa. huimarisha Umoja na Amani. 

Kwa mujibu wa shirika hilo, taarifa sahihi zinaweza kusaidia kuelimisha jamii kuhusu afya, kumsaidia mkulima, kumlinda mtumiaji wa dawa, kuhamasisha uhifadhi wa mazingira na kumwezesha mwananchi kushiriki katika maendeleo ya Taifa.

Siku ya Kimataifa ya Upatikanaji wa Taarifa huadhimishwa kila mwaka tarehe 28 Septemba, ikiwa na lengo la kuhamasisha upatikanaji wa taarifa, uwazi, uwajibikaji na mazingira yanayomwezesha mwananchi kupata taarifa muhimu kwa maisha na maendeleo yake.

Taarifa hii imetolewa na Boniventura Mwalongo, Katibu Mkuu wa Shirika la Dawa Asilia na Ulinzi wa Mazingira Tanzania (TRAMEPRO).