TRA PWANI YAKUTANA NA WAFANYABIASHARA WA MAFUTA YA KUPIKIA BAGAMOYO

Na Victor Masangu, Bagamoyo

MAMLAKA ya Mapato Tanzania (TRA) Mkoa wa Pwani imekutana na wadau wa Forodha, wakiwemo wafanyabiashara wanaojihusisha na uingizaji na usafirishaji wa mafuta ya kupikia kupitia Bandari ya Bagamoyo, kwa lengo la kusikiliza changamoto zao na kujadili namna ya kuzipatia ufumbuzi.

Kikao hicho kilichofanyika katika Ofisi za TRA Wilaya ya Bagamoyo ni sehemu ya juhudi za mamlaka hiyo kuimarisha ushirikiano na wadau wa Forodha, kuboresha mawasiliano na kuweka mazingira rafiki kwa shughuli halali za biashara.

Akizungumza katika kikao hicho, Meneja wa TRA Mkoa wa Pwani, Peter Jackson, amesema mamlaka hiyo itaendelea kusimamia sheria na taratibu za Forodha huku ikiweka mazingira wezeshi kwa wafanyabiashara wanaozingatia sheria.

Amesema udhibiti wa bidhaa za magendo unafanyika kwa kushirikiana na vyombo vingine vya Serikali, huku akisisitiza umuhimu wa kutoa elimu ya kodi na Forodha kwa wafanyabiashara ili kuongeza uelewa na uzingatiaji wa sheria.

Kwa upande wao, baadhi ya wafanyabiashara wameishukuru TRA Mkoa wa Pwani kwa kuwapa nafasi ya kuwasilisha changamoto zao na kujadiliana njia za kuzitatua.

Wamesema mazungumzo hayo yameimarisha mawasiliano na ushirikiano kati yao na TRA, huku wakitoa matumaini ya kuendelezwa kwa mikutano hiyo ili changamoto zinazojitokeza katika shughuli zao za biashara zipatiwe ufumbuzi kwa wakati.