NEC ya CCM yaanza kikao butiama

Mwenyekiti wa CCM, Rais Jakaya Kikwete ,Makamu Mwenyekiti wa CCM na Rais wa Zanziabar, Aman Karume (kushoto), Makamu Mwenyekiti wa CCM, Bara, Pius Msekwa (kulia) na Katibu Mkuu wa CCM, Yusu Makamba wakiimba wimbo wa CCM kabla ya kuanza kikao cha Kamati Kuu ya CCM kilichoanza leo katika Kijiji cha Butiama

Mwenyekiti wa Chama cha Mapinduzi (CCM), Rais Jakaya Mrisho Kikwete leo ameongoza kikao cha Kamati Kuu ya Halmashauri Kuu ya Taifa ya CCM (NEC) katika kijiji cha Butiama, wilaya ya Musoma, Mkoa wa Mara.

Kikao hicho kimeanza baada ya Rais Kikwete kuwasili Butiama tayari kwa kikao cha Halmashauri Kuu ya Taifa ya CCM .

Kikao cha NEC kinaanza leo ikiwa ni mara ya kwanza kufanyika katika kijiji ambako alizaliwa Baba wa Taifa na mwanzalishi wa taifa la Tanzania, Mwalimu Julius Kambarage Nyerere.

Rais Kikwete aliwasili Butiama kwa barabara akitokea Mwanza ambako ndege yake ilitua katika Uwanja wa Ndege wa Mwanza mapema asubuhi na akaamua kusafiri kwa gari kwenye Musoma.

Mjini Mwanza, mamia ya wakazi wa mji huo na vitongoji vyake, walijitokeza kwa wingi, katika baadhi ya sehemu za jiji hilo mvua ikiwa inanyesha, kumshangilia Rais wakati msafara wake ukikatisha mitaa ya jiji hilo kuelekea Musoma.

Mara tu baada ya kuwasili Butiama ambako alipokelewa na mamia ya wananchi, Rais Kikwete alifungua ukumbi mpya wa mikutano ambao utatumika kwa ajili ya kikao cha NEC.

Ukumbi huo unaitwa Joseph Kizurira Nyerere, mdogo wake Baba wa Taifa.Ukumbi huo umejengwa kiasi cha mita 300 kutoka nyumbani kwa Marehemu Joseph Kizurira Nyerere.

Mara baada ya kufungua na kutembelea ukumbi huo, Rais Kikwete aliwapokea wazee 17 ambao wametembea kwa mguu, kwa siku mbili, kutoka mjini Musoma hadi Butiama, ili kuunga mkono uamuzi wa CCM kufanyia mkutano wake wa NEC ya chama hicho katika kijiji alikozaliwa Mwalimu Nyerere. Kijiji hicho kiko kiasi cha kilomita 32 kutoka Musoma mjini.

Wazee hao pia wameeleza kuwa walitembea kutoka Musoma hadi Dar Es Salaam kuunga mkono Azimio la Arusha mwaka 1967.

Akizungumza na wananchi katika tukio hilo mbele ya jengo la ukumbi huo mpya, Mwenyekiti wa CCM ameelezea sababu za CCM kufanyia mkutano wake Butiama.

Amesema kuwa uamuzi huo ulitokana na uamuzi wa CCM kurudia utaratibu wake wa zamani wa kufanyika vikao cha NEC katika mikoa mbali mbali nchini badala ya vikao vyote kufanyika Dodoma kama ambavyo imekuwa katika miaka ya karibuni.

Amesema kuwa baada ya uamuzi wa kurudia utaratibu huo wa zamani,ulikuwa ni mkoa wa Mara uliojitolea kuandaa mkutano wa kwanza wa kawaida wa NEC, baada ya uchaguzi mkuu ndani ya chama, Novemba mwaka jana, mjini Dodoma.

“Basi mkoa wa Mara ulipojitolea kuandaa mkutano wa kesho,mimi nikasema basi kikao hicho kifanyike Butiama, kwa heshima na kumuenzi mwanzilishi wa chama chetu na taifa letu, Mwalimu Nyerere,”

“Hii ndiyo maana tuko hapa.Hiki ni kikao cha kawaida tu cha NEC.Hii ndiyo siri ya kikao kufanyika hapa. Wengine wamekuwa wanaogopa, wengine wamejijengea matumaini ambayo hayapo, lakini hiki ni kikao cha kawaida katika utaratibu wetu mpya na utaratibu huu utaendelea,” alisema Rais Kikwete.