libeneke la taswirazzz

taswira 1
taswira 2

taswira 3

Mh. Balozi
Nimeona darasa ulilotoa kwenye post ya jua.

Naomba somo zaidi katika kuchukua taswira kama hizi.

Mdau O.P.

-----------------------------------------------

Mdau O.P.

Kwanza asante kwa kuendeleza libeneke. Pili hongera sana kwa picha mwanana. Kwa kweli umejitahidi sana sana, hasa ukizingatia kwamba hiyo Olympus FE-170 point-and-shoot uliyotuia haikupi uchaguzi (choice) mkubwa wa mambo mengi kama vile kuvuta (zoom) ama kuweka chujio (filter) kwenye lenzi yako.

Vile vile hapo shimoni Ngorongoro huna uchaguzi wa muda wa kwenda, hivyo umelumangia hivyo hivyo na kijua cha mchana (nadhani ilikuwa kati ya saa 7 na 9 ) hivyo ikabidi utumie mwanga uliopo ambao kwa ukali wake picha kutoka vyema si muda mzuri. Muda mzuri wa kupata picha nzuri ni masaa mawili kabla ya machweo ama baada ya jua kupanda. Ama ukiwa na bahati kuwe na mawingu mazito kiasi, na hakuna mwanga mkali kama huo ambao unapunguza sana utamu wa rangi.

tukija kwenye taswira 1. hapo sina neno kwani ujumbe umeukamata inavyotakikana, na huyo dada anayeinama na kamera kaongeza nakshi, kadhalika na huyo aliyekaa kiti cha mbele na kufunga kioo inajieleza yenyewe hali halisi ilivyokuwa. Na wewe ungesogea kushoto zaidi ingekuwa mswano, ila najua gari hairuhisiwi kukanyaga nyasi nje ya barabara. labda kwa kuibia kama jamaa yule wa kule. hivyo umesamehewa kwa engo hiyo.

taswira 2. inajieleza yenyewe kwamba umemuonea huyo twiga wa kushoto. kwa nini umemkata kichwa wakati ungebalansi na kula nafasi ulioacha wazi kulia ingekuwa bomba sana. milima inaonekana vyema ila ukungu (hue) wa buluu umeondoa chachandu ya rangi. hapo ungekuwa na kamera yenye kubeba chujio (filter) hasa ile ya skylight ukungu ungepungua kama si kutoweka kabisa.

taswira 3. Naam! hiki kitu kimetulia. ujumbe umefika, na uhai upo (jamaa aliyesimama kuleeee) maana wadau wengi wanasahau kuweka uhai kwenye picha za namna hii. wengi wangeishia kupiga magari tu, ambapo picha ingekufa kwa kukosa kiumbe hai. Yaani kama unapiga picha milima ama uwanja ama sehemu yoyote ya wazi kama hii usisahau kuweka kiumbe hai, hata kiwe kiduchu kama kuku. pia kwenye hii picha hivyo vijiwe vimatengeneza fremu njema kwa mtazamaji, kwani vijiwe vinafanya jicho lako likimbilie kwenye ujumbe ambao ni magari. tatizo katika snepu hili ni muda uliopigia. jua ni kali sana na rangi haijakolea inavyotakiwa. lakini kama zilivyo zingine, hukuwa na uchaguzi. msafara kama huo unakuwa noma pale unapotaka kupata picha tamu. lakini hongera na asante tena kwa kuendeleza libeneke hili. natumai wadau 'walevi' wa taswira wataendelea kutuletea burudani zaidi.

-michuzi