Mtambo wa kuzalisha umeme wa Songas ulioharibika kuanza kufanya kazi ndani ya wiki moja kuanzia leo

Na Anna Nkinda – Maelezo 

Serikali imesema kuwa ndani ya wiki moja kuanzia leo mtambo wa kuzalisha umeme wa Kampuni ya Songas ulioharibika utakuwa tayari na kuanza kufanya kazi kama kawaida. 

  

Hayo yamesemwa leo na Waziri wa Nishati na Madini William Ngeleja alipofanya ziara ya kutembelea mitambo hiyo iliyopo Ubungo jijini Dar es Salaam ili kuona maendeleo ya matengenezo ya mitambo miwili iliyosababisha upungufu wa megawati 50 za umeme katika gridi ya Taifa. 

  

“Kwa taratibu za kawaida matengenezo ya mtambo huu yangechukua miezi mitatu hadi minne ila mafundi wanafanya kazi ya matengenezo  kwa bidii na hatua waliyofikia  watachukua muda mfupi kumaliza kazi hii”, alisema waziri Ngelleja. 

  

Aliendelea kusema kuwa mgao unaoendelea ni kutokana na ajali ya kuharibika kwa mtambo mmoja kwani mtambo mwingine uko katika matengenezo ya kawaida ila baada ya kuharibika kwa mtambo huo ndiyo tatizo limeongezeka zaidi. 

  

Ngelleja alisema kuwa, “Serikali haina mpango wa kuwafanya wananchi waishi gizani zipo hatua nyingi ambazo wanazichukua na watazitolea ufafanuzi kadri siku zinavyokwenda”. 

  

Waziri huyo alimalizia kwa kusema kuwa hivi sasa tatizo wanalolifanyia kazi ni  kuongezeka kwa mahitaji ya umeme  kuliko uwezo wa kuzalisha. 

  

Mtambo wa pili wenye uwezo wa kuzalisha megawati 35 ambao uko katika matengenezo ya kawaida unatarajia kuanza kazi baada ya  wiki mbili tangu kuanza kwa matengenezo hayo. 

  

Hivi sasa mtambo ulioharibika  umefumuliwa na kuanza kutengenezwa upya na una uwezo wa kuzalisha megawati  20 za umeme kama utaanza kazi utakuwa umepunguza makali ya mgao wa umeme kwa kiasi fulani. 

  

Kuanzia Alhamisi wiki hii jijini Dar es Salaam kumeanza mgao wa umeme ambao unaleta usumbufu kwa wananchi  kutokana na kuharibika kwa mitambo hiyo