mtanange wa watani wa jadi

Mgeni wa heshima Dk. Switebert Mkama akikabidhi Kombe kwa kepteni wa Simba Vicent Ndusilo

furaha ya ushindi

kushinda kutamu, hasa ikiwa umembenjua mtani wa jadi

watoto wa msimbazi

wana wa jangwani

Simba yairarua Yanga 3-2 Marekani 

Na Ripota wa Globu ya Jamii,Washington DC

TIMU inayoundwa na washabiki wa klabu ya Simba wanaokula maisha Mamtoni hapa Washington DC, jana iliwalaza wenzao wa Yanga kwa mabao 3-2 katika mchezo ambao hautasahauliwa kwa miaka mingi ijayo. 

Simba ilipata mabao yote matatu katika kipindi cha kwanza ambacho mwamuzi wa mchezo huo, Abuu Gadhafi, alilazimika kukikatisha ili kuiokoa Yanga isimalizwe na mnyama mkali. 

Bao la kwanza la Simba lilifungwa na Vincent Ndusilo kwa shuti kali kunako dakika ya 20 baada ya kupokea pasi murwa kutoka kwa kiungo machachari, Liberatus Mwang’omba.  

Haikuchukua muda, kwenye dakika ya 28 Vincent tena alimsalia mlinda mlango wa Yanga, Lucas ‘Kinyang’anyiro’ Mukami, kwa mpira wa kichwa. Lucas pia ni kocha msaidizi wa Yanga. 

Ikicheza kwa kasi na nguvu, Simba ilipata bao la tatu kwenye dakika 33 kupitia kwa mchezaji wake wa kulipwa iliyemsajili kutoka Nigeria, Gilles Che ‘Obina Orji’ baada ya kupokea pasi kutoka kwa Liberatus. 

Wakati wa mapumziko baadhi ya wana Yanga walitoa wazo la kuweka mpira kwapani lakini kocha wao, Yassin Matola ‘Kondic’ alipinga hatua hiyo huku mwenzake wa Simba, Marko Mbullu ‘Phiri’ akishangilia. 

Bahati mbaya vijana wa Simba walilewa moshi wa nyama ya kuchoma ulioshamiri uwanjani hapo, na ndipo wana Yanga walipotumia mwanya huo kusawazisha bao la kwanza kunako dakika ya 55. Alikuwa ni Diddy Rouba aliyewahi kuichezea Miembeni ya Zanzibar, ambaye alibaki na kipa Charles Mbah, mzaliwa wa Nigeria na kupiga shuti wavuni. 

Huku muda ukiyoyoma, Yanga walianza kucheza mchezo wa rafu na ubabe ili kuwakabili Simba waliokuwa wakipepea kama nyuki, lakini mwamuzi Gadhafi ambaye miaka ya nyuma aliwahi kuichezea Yanga, hakuna na kadi nyekundu mfukoni.  

Katika moja ya udhibiti mkali wa mabeki wa Yanga, kunako dakika ya 80 Aristotle Maruma alilazimika kumkaba shingo mshambuliaji hatari wa Simba, Gilles, kwa staili ya Athuman Juma Chama na Mogella enzi za miaka ya 1980. Mwamuzi alitoa adhabu ndogo ambayo haikuzaa matunda. 

Hatimaye Yanga walifanikiwa kupata bao la pili la kusawazisha kwenye dakika ya 91 lililofungwa tena na Diddy kwa shuti kali la mita 40 na juhudi za mwamuzi kuongeza dakika nane zaidi hazikufanikiwa kuikoa Yanga. 

Mgeni wa heshima katika mchezo huo, Ofisa Ubalozi wa Tanzania mjini Washington, Dkt. Switbert Mkama, alikabidhi kombe la ushindi kwa nahodha wa Simba, Vincent Ndusilo na kuhitimisha mchezo huo. Baada ya hapo sherehe kubwa ya kutafuna nyama za kuchoma na vinywaji ilishamiri. 

Ghafla baada ya mchezo, kiongozi wa Simba, Rashid Mkakile ‘Bamchawi’ ambaye anadaiwa alilala uwanjani hapo kugangua, aliibuka na kutamka kuwa Yanga haitashinda kamwe kwenye uwanja huo wa Meadlebrook, uliopo kwenye kitongoji wa Silver Spring, kilomita chache kutoka kwenye maraha ya Washington DC. 

Aidha katika hali ya kufurahisha, timu hizo zilitumia jezi zilizonunuliwa mwei huu Kariakoo jijini Dar es Salaam ili kuonesha uzalendo kwa nchi yao badala ya kununua jezi kwenye nchi ya kigeni. 

Mdhamini wa Yanga, Said ‘Warren Buffett’ Nassoro, ameahidi kusajili wachezaji zaidi kwa ajili ya mchezo ujao ambao haujapangwa utafanyika lini.