karibuni katika mwaka kogwa makunduchi 2009

Kwa heshima na taadhima tunawaalika Watanzania wote popote walipo pamoja na watu wa mataifa yote kuhudhuria sherehe za jadi za Mwaka Kogwa tarehe 20.07.09 zitakazofanyika huko Makunduchi, Wilaya ya Kusini, Mkoa wa Kusini Unguja.

Sherehe zetu zinachukua siku nne; siku ya kwanza, ambayo huwa kivutio kwa watu wengi, huanza na mapigano yanayoanza kuanzia saa 5 Asubuhi katika eneo liitwalo Kae Kuu, katikati ya mji wa Makunduchi.


Mapigano hayo hukutanisha Wamakunduchi wanaoishi upande wa Kusini na wale wanaoishi upande wa Kaskazini. Silaha inayotumika ni makoa ya migomba. Zamani bakora zilitumiwa. Lengo la mapigano ni kujaribu kuondoka tofauti au uhasama wowote ule uliotokea miongoni mwa Wamakunduchi kutoka pande hizo mbili kwa kipindi cha mwaka uliopita ili kuanza mwaka mpya bila ya chembe ya uhasama ya mwaka uliopita.


Mila hii husaidia sana watu wa Makunduchi kuishi kwa mapenzi na mshikamano. Baada ya mapigano ambayo huishia kwenye saa 8 mchana watu hurejea nyumbani ambako chakula kizuri kimeandaliwa. Kimila chakula hicho cha mchana huliwa nje ya nyumba ili kutoa nafasi kwa wageni kujumuika na wenyeji.


Wakati wa usiku sherehe huendelea kwa ngoma, disco na mambo kama hayo katika viwanja vya sehemu iitwayo Koba, karibu na kituo cha Polisi. Kwa maelezo zaidi angalia mtandao wetu wa kijiji cha mzuri, miongoni mwa vijiji vya Makunduchi:
http://www.mzuri-kaja.or.tz


Kwa waandishi wa habari na watafiti wanaweza kuniandikia kwa kupata maelezo ya ndani ya namna nzuri ya kupata habari za kutosha za mwaka kogwa Jina:

Mohamed Ameir Muombwa

mmuombwa@hotmail.com
mobile: 0773539504


Karibuni nyote Makunduchi kusherehekea
mwaka mpya wa watu wa Makunduchi.