Tanzania na China zasaini Mkataba wa ushirikiano

Waziri wa Habari, Utamaduni na Michezo, Mh. George Mkuchika akiongea na wanahabari wakati wa kusaini mkataba wa ushirikiano katika sekta ya Habari, Utamaduni na Michezo kati ya Tanzania na China leo jijini Dar. Kushoto ni Balozi wa China nchini Tanzania Mh. Liu Xinsheng.

Picha na habari na Aron msigwa wa MAELEZO.

CHINA KUONGEZA NAFASI

ZA MASOMO KWA WATANZANIA.

Tanzania na China zimekubaliana kuendeleza ushirikiano katika Sekta ya Habari, Utamaduni na Michezo.

Akiongea na waandishi wa habari leo jijini Dar es salaam wakati wa kusaini mkataba mpya wa ushirikiano wa miaka mitatu baina ya Tanzania na China Waziri wa Habari Utamaduni na Michezo George Mkuchika amesema kusainiwa mkataba huo ni ishara ya uhusiano mzuri uliopo kati ya nchi hizi.

Amesema kwa kipindi kirefu Tanzania imekuwa ikishirikiana na China katika Nyanja mbalimbali zikiwemo elimu, Utamaduni,sekta ya habari, Afya pamoja na mambo mengine ishara inayoonyesha uhusiano mzuri kati ya Tanzania na China.

Waziri Mkuchika amesema kwa kipindi kirefu toka mwaka 1964 Tanzania imekuwa ikipokea wataalam katika fani mbalimbali za ujenzi, wataalam wa afya,walimu katika fani mbalimbali na viwanda ambao wamekuwa msaada mkubwa sana katika kubadilishana uzoefu na wataalam wa ndani hapa nchni.

Ameongeza kuwa watanzania wengi wamekuwa wakienda nchini china kujifunza mambo mbalimbali ya kiutamaduni,kushiriki michezo mbalimbali, kupata nafasi za masomo katika fani mbalimbali na hivyo kukuza na kuleta maendeleo nchini.

Naye balozi wa China nchini Tanzania Liu Xinsheng akizungumza mara baada ya kusaini mkataba huo wa ushirikiano na Tanzania amesema kuwa ushirikiano uliopo kati ya Tanzania na China utaendelea kudumishwa akitoa mfano wa nchi yake kuongeza maradufu nafasi za masomo kwa vijana kutoka Tanzania kwenda kimasomo nchini china toka mwaka 2006.

Ameongeza kuwa kwa mwaka huu 2009 watanzania wengi walipata nafasi zaidi ya kwenda nchini humo kwenda kujifunza mambo mbalimbali katika masomo ya udaktari, Nyanja ya utamaduni, kushiriki matamasha mbalimbali ya michezo pamoja na nafasi mbalimbali za waandishi wa habari kupata fursa ya kutembelea nchi hiyo.

Aidha amesema nchi yake itaendelea kuongeza nafasi zaidi kwa watanzania kila mwaka ili wapate nafasi ya kwenda nchini China kujifunza na kupata uzoefu katika mambo mbalimbali na hivyo kuleta maendeleo nchini.

Kwa upande wake Mkurugenzi wa Idara ya Maendeleo ya Utamaduni Prof. Hermas Mwansoko amesema kusiniwa kwa mkataba huo kutatoa fursa nzuri kwa watanzania kushiriki katika mambo mbalimbali yakiwemo matamasha ya kiutamaduni, kupata ujuzi na elimu katika uandaaji wa filamu na hivyo kukuza sekta ya Utamaduni hapa nchini.

Kuhusu elimu Prof. Mwansoko ameishukuru serikali ya China kwa kuendelea kutoa nafasi takribani 100 kila mwaka kwa vijana kutoka Tanzania kupata nafasi ya kwenda kusoma katika ngazi mbalimbali kuanzia sekondali, shahada za uzamili na uzamivu katika Nyanja mbalimbali.

Akitoa maelezo kuhusu faida ilizopata Tanzania katika mkataba wa awali kati ya Tanzania na China kabla ya kusainiwa kwa mkataba mpya Prof. Mwansoko amesema Tazania imenufaika kwa kiwango kikubwa sana katika sekta bya habari, Utamaduni na Michezo akitoa mfano wa ujenzi wa Uwanja mpya wa mpira ambao uko katika kiwango cha kimataifa.

Mbali na ujenzi huo amesema Tanzania imefaidika kwa kiwango kikubwa na kupata kasi ya kimaendeleo inayoridhisha kwa kuwapata madaktari wanaotoa huduma za afya, ujenzi wa miundombinu zikiwemo barabara na pia kazi mbalimbali ambazo zimekuwa zikifanywa na makampuni kutoka nchini china kutokana na zabuni zinazotolewa kwa utaratibu unaokubalika.