julai 18 ni siku ya kimataifa ya Nelson Mandela

Na Mwandishi Maalum
New York
Baraza Kuu la Umoja wa Mataifa limepitisha kwa kauli moja azimio la kuizindua rasmi Julai 18 kuwa siku ya Kimataifa ya Nelson Madiba Mandela. ( Nelson Mandela International Day)Na itaanza kuadhimishwa rasmi mwaka 2010.

Azimio hilo ambalo liliandaliwa na Ubalozi wa Afrika ya Kusini katika Umoja wa Mataifa, na kuungwa mkono na nchi wanachama wa Umoja wa Mataifa zaidi ya 120. Pamoja na mambo mengine inataka jumuia ya kimataifa kuiadhimisha siku hiyo katika namna inayofaa.
Julai 18 ndiyo siyo aliyozaliwa Mzee Nelson Mandela mpigania ukombozi na rais wa kwanza mweusi wa Afrika Kusini huru.

Madhumuni ya siku hiyo ya Mandela na kwa mujibu wa azimio hilo , ni kutambua na kuheshimu mchango wa kutukuka ambao Nelson Mandela ameutoa, katika kupigania uhuru na demokrasia nchini afrika kusini, kupigania usawa na haki, kupinga utawala wa kibaguzi dhidi ya dini, rangi, kabila na jinsia na kujenga utamduni wa amani na maridhiano.

Kila mzungumzaji aliyesimama kuchangia umuhimu wa kuwa na siku ya Nelson Mandela kimataifa, alimuelezea kiongozi huyo , kama kiongozi wa aina yake, ambaye licha ya mateso aliyoyapata kutoka kwa utawala wa kibaguzi wa makaburu, lakini aliamua kwa nia ya dhati kuwasamehe wabaya wake.
Na kama hiyo haitoshi, akaanzisha mchakato wa mapatano na maridhiano. Mchakato uliolenga kuwaunganisha wananchi wa Afrika ya Kusini bila ya kujali tofauti zao.

Akizungumza kwa niaba ya serikali ya Tanzania , Balozi wa Tanzania katika Umoja wa Mataifa, Augustine Mahiga, akiungana na wasemaji wengine, anaeleza kwamba katika mambo yote ambayo Mandela aliyasimamia, kuyatetea na kuyapigania.

Kati ya yote hayo kubwa ni ule wito wake kutaka maridhiano na makaburu watu ambao walimfunga na kumtesa kwa miaka 27.

“ Hiki ni kielelezo hai na ambacho kinatakiwa kuigwa na jumuia ya kimataifa. Umoja wa Mataifa unatakiwa kurithisha vizazi vijavyo kwa kuadhimisha na kusherehekea siku Kimataifa ya Mandelea ambayo leo tunaipitisha kama sehemu ya kuendeleza na kudumisha utamaduni wa amani” akasema Balozi.

Akasema katika kilele cha umri wake wa miaka 92, Mandela anabaki kuwa alama ya mapambano ya uhuru, usawa na demokrasi dhidi ya utawala wa kibaguzi, ubaguzi wa aina yake kupata kutokea katika mfumo wa siasa za karne ya 20.

“Mandela yuko katika kilele cha maisha yake,

maisha ambayo yamekuwa tafsiri sahihi ya amani ndani ya Afrika ya Kusini, Barani Afrika na dunia kwa ujumla. Ni alama ya ushujaa pale kwenye machafuko, mwenye moyo wa shupavu mbele ya kifo, aliyesimamia hadhi dhidi ya udhalilishaji, na mwenye ukarimu dhidi ya dhuluma. Na zaidi ya yote ni alama na kielelezo cha utafutaji wa haki kwa gharama yoyote ile” anasisitiza Balozi Mahiga.

Balozi Mahiga anabainisha kwamba, kwa sasa Mandela ndiye kiongozi hai aliyebaki kati ya viongozi wengine maarufu na mashuhuri wana-afrika na ambao ni watangulizi wake.

Anawataja viongozi hao waliokuwa mstari wa mbele katika kuendesha vita vya ukombozi, kuwa ni Baba wa Taifa Mwalimu Julius Kambarage Nyerere, Kwame Nkuruma, Jomo Kenyata, Nandi Azikiwe na Sengho.

Kampeni ya kutaka julai 18 ambayo ni siku ya kuzaliwa Nelson Mandela, itambuliwe kama siku kimataifa ya Nelson Mandela ilianzishwa na Taasisi isiyo ya kiserikali ya Nelson Mandela Foundation , kwa kushirikiana na wadau wengine.

Kampeni hiyo ilieendelezwa mwaka huu na ubalozi wa kudumu wa Afrika kusini katika umoja wa mataifa kwa kuanzisha mchakato wa utayarishaji wa azimio hilo ambalo baada ya kuungwa mkono na nchi wanachama wa umoja wa mataifa, hatimaye liwasilishwa katika Baraza Kuu ambapo limepitishwa rasmi.