mwimbaji wa jahazi modern taarab ala nondozzz

Mwimbaji wa kundi la muziki la Jahazi Morden Taarabu, Mwanne Othman (katikati) akiwa katika picha ya pamoja na wahitimu wenzake mara baada ya kula nondozzz ya Diploma ya uandishi wa habari katika mahafali ya 15 ya chuo cha uandishi wa habari (DSJ ) yaliyofanyika jijini Dar wikiendi ilopita. Shoto ni Mwajuma Njama na kulia ni Salama Saleh.

‘Waandishi msikubali kununuliwa’

Waandishi wa habari wametakiwa kuzingatia misingi ya taaluma na kutokubali kununuliwa ili kutimiza wajibu wao kwa jamii na taifa kwa ujumla.

Wito huo umetolewa na Katibu Mtendaji wa Baraza la Habari Tanzania (MCT), Kajubi Mukajanga wakati wa mahafali ya 15 ya Chuo cha Uandishi wa Habari Dar es Salaam (DSJ) yaliyofanyika mwishoni mwa wiki iliyopita.

Mukajanga aliwahimiza wahitimu wa astashahada na stashahada kwamba wanatakiwa kukabiliana na changamoto mbalimbali kwenye tasnia ya habari, hasa katika kipindi hiki cha kuelekea uchaguzi mkuu.

"Andikeni habari zilizokamilika, katu msikubali kununuliwa, fanyeni kazi kwa bidii na mjaribu kuthubutu," alisema.

Aidha, alisema miongoni mwa changamoto zinazoikabili jamii, wakiwemo wanahabari, ni tatizo la rushwa, na akaonya kwamba wasitumie kalamu zao kupotosha habari kwa shinikizo la fedha.
"Kuna changamoto nyingi mojawapo ikiwa ni rushwa, mnapaswa kutambua kwamba ingawa fedha ni nyenzo muhimu, lakini pia si kila kitu… kinachotakiwa ni utashi, dhamira, ustahimilivu na uvumilivu. Ndivyo vitu vyenye nafasi muhimu katika mafanikio ya mwanadamu," alisema Mukajanga.

Akaongeza; "Hiki ni kipindi mwafaka kwa waandishi wanaoingia sokoni kwani nchi inaelekea kwenye uchaguzi mkuu. Kwa mwanahabari aliye tayari kujituma, kuna kila habari ya kufukuzia, na wakati huo huo kuna changamoto ambazo ukizipitia utakuwa umepita katika chungu muhimu kitakachokupika … lakini katu msidanganyike, msikubali kununuliwa, andikeni habari za kweli na sahihi na hapa atakayekuwa na bidii, atakayethubutu, kwa hakika, mbingu itaamua."

Kama alivyosema Mukajanga, habari ndiyo inayomfanya mwandishi awe mwandishi, na wataalamu wanasema; "Mwandishi ni mzuri leo!" Maana yake ni kwamba, habari uliyoichepisha leo ndiyo inayokupima kama umeiandika kwa umakini au vipi, siyo ile uliyoiandika juzi au jana.
Changamoto inayowakabili waandishi wa Tanzania hivi sasa ni kubwa sana , hasa kutokana na taifa kukumbwa na kashfa nyingi ambazo zinawahusisha watu wengi waliokiuka maadili.
Ingawa vyombo vingi vya habari, kila kimoja kwa nafasi yake, vinaripoti mambo mbalimbali kwa namna yake, lakini ukweli ni kwamba, hata waandishi wenyewe wako kwenye mkumbo huo huo wa mmomonyoko wa maadili.

Suala la mwandishi kuandika habari kwa shinikizo la mtu fulani mwenye maslahi fulani, au kuamua kumchafua fulani ili kumkweza fulani, siyo geni sasa kwa vyombo vya habari vya Tanzania, hali ambayo inatia hofu kwamba taaluma ya habari - ambayo kimsingi ni muhimili wa nne wa serikali - imepoteza mwelekeo wake.

Hali hii inatakiwa kudhibitiwa, kwa kuleta mabadiliko ya dhati kuanzia kwenye nafsi za waandishi wenyewe, ambao kwa kiasi kikubwa kama hawakubadilika wanaweza kuipotosha jamii na hata kuivuruga zaidi serikali.

Pamoja na changamoto nyingine zilizopo kama kutokuwepo na ajira za uhakika kwenye sekta hiyo, lakini bado taaluma ya habari imesimama imara katika kuhakikisha kwamba jamii inapata haki yake ya msingi, na vile vile serikali na mamlaka husika zinafikisha ujumbe maridhawa kwa jamii katika kiwango kinachotakiwa.

Vyombo vinavyosimamia taaluma ya habari, likiwemo Baraza la Habari, vinapaswa kuwasaidia waandishi kwa namna moja ama nyingine, na siyo kuwaangalia zaidi wamiliki wa vyombo vya habari.

Mukajanga anasema kwamba baraza lake linashughulikia kuondoa kero zinazowakabili wanafunzi wa fani ya uandishi wa habari wanapotakiwa kufanya mafunzo kwa vitendo, ambapo wengi wao hunyimwa nafasi kwenye vyombo vya habari bila sababu za msingi.

Lakini mafunzo ya vitendo ni sehemu tu ya changamoto hizo, zilizo kubwa ni kukosekana kwa ajira ama mikataba ya ajira hata kwa waandishi wazoefu kunakofanywa na wamiliki wa vyombo vya habari, huku waandishi wengi wakichukuliwa kuwa 'wa kujitegemea' hata baada ya kuchangia kazi kwenye vyombo hivyo kwa miaka kadhaa.

Jambo hili linawavunja moyo wale wanaotaka kuingia kwenye taaluma hiyo ambao wanaiona kama haina manufaa kwa sababu hatua ya waajiri kuwatumikisha waandishi kama vibarua kwa miaka mingi nayo husababisha baadhi ya waandishi kukiuka maadili na kuamua kujiingiza hata

kwenye vitendo vya rushwa.

Suala jingine ni kwa waandishi wa habari kung'ang'ania zaidi kufanyia kazi mijini badala ya kwenda vijijini ama kugeukia sekta nyingine ambazo ziko karibu na jamii zaidi.

Ndiyo maana Mkuu wa Chuo hicho, Mchungaji Wilson Chiduo, anasema kwamba wahitimu wa mahafari hayo ya 15 wakizingatia maadili ya taaluma na kuona umuhimu wa kuwa karibu na jamii, wanaweza kujikita katika kuandika habari juu ya umaskini, elimu, siasa, uchumi, mazingira, utalii na rushwa.

Katika risala yao , wahitimu hao nao wameahidi kutumia elimu waliyopata kuitumikia jamii kwa kuzingatia maadili ya uandishi wa habari.

Chuo cha DSJ kilianzishwa mwaka 1998, kilipata usajili wa kwanza na NACTE 2005 na kupata usajili wa kudumu mwaka 2007 namba REG/PWF/012. Mwaka 2009 kimepandishwa hadhi na NACTE na kuwa "Candidate of Accreditation".

Kozi zinazofundishwa chuoni hapo ni uandishi wa habari na utangazaji kwa ngazi ya stashahada (Diploma) na astashahada (advanced certificate), utangazaji wa Radio, picha za mnato (Photojournalism), Picha mwendo (Television), Talakishi (Computer), Mahusiano ya Umma pamoja na utayarishaji wa matangazo (Public Relations and Advertisement).

Source: TAIFA Tanzania , Desemba 18, 2009